Янги китоб: “Ўзбекистон: Давлат, жамият ва миграция”
Самарқанд давлат архитектура-қурилиш университетида туркиялик олимлар томонидан ёзилган “Ўзбекистон: Давлат, жамият ва миграция” китобининг тақдимоти ўтказилди.
Тадбирда университет ректори Чидем Туркйилмаз, Туркия Республикаси ички ишлар вазирлиги илмий тадқиқотлар маркази (AREM) раиси Селим Чапар, Туркия Республикасининг Самарқанд шаҳридаги бош консули Салиҳ Жанер, университет профессор-ўқитувчилари ва талабалар иштирок этди.
Муаллифлар Ўзбекистон тарихи, маданияти, сиёсий тизими ва миграция масалаларига оид тадқиқотлари, шунингдек, Самарқанд, Бухоро, Хива каби шаҳарларда олиб борган изланишлари ҳақида фикрларини билдирдилар.
Мазкур асар Ўзбекистон ва Туркия ўртасидаги илмий ҳамкорликни янада мустаҳкамлайди, Туркияда Ўзбекистонни танитишда муҳим роль ўйнайди.
- Ўзбекистон ва Туркия ўзаро тарихий илдизлар ва маданий мерос билан боғланган бўлиб, сиёсат, иқтисодиёт ва таълим соҳаларида фаол ҳамкорликни ривожлантирмоқда, - дейди университет ректори Чидем Туркйилмаз. - “Ўзбекистон: давлат, жамият ва миграция” каби ўзаро ҳамкорликда олиб борилган илмий изланишлар асосида яратилган асарлар туркий халқлар дунёсининг бирлигини намоён этади ва билим алмашинувига ҳисса қўшади.
Ўзбекистон туркларнинг Ўрхундан кейинги иккинчи маданий марказидир. У турк маърифатининг маркази ҳамдир. Туркларнинг тарихда учта маданият маркази бўлган. Биринчиси Ўрхун. Турклар Катта Туркистон географиясини босқичма-босқич, Ўрхун ҳудудига асосланиб қурдилар.
Туркларнинг иккинчи маданий ва иқтисодий маркази скиф турклари, оқ ҳунлар ва гўктурклардан бошланган жараён билан Мовароуннаҳр ва Қашқар географиясига айланди.
X асрдан бошлаб турклар Анадолуни учинчи иқтисодий, маданий ва сиёсий тортишиш марказига айлантирдилар, бу эса Мовароуннаҳр географиясига асосланиб, шарқий савдо йўлининг энг чекка нуқтаси бўлди. Туркларнинг учта маданий-ижтимоий маркази моҳиятан бир-биридан озиқланади ва бир-бири билан қадимий чамбарчас боғлиқдир.
- Бу китоб туркларнинг Ўрхундан кейинги иккинчи маданий маркази ҳамда турк маърифатининг ўрни бўлган Ўзбекистонни давлат, жамият ва кўчиш сарлавҳалари остида ўрганишни мақсад қилган, - дейди Туркия Республикаси ички ишлар вазирлиги илмий тадқиқотлар маркази раиси Селим Чапар. - Назарий ва адабий асосга эга бўлган асар Туркия ва Ўзбекистонда олиб борилган дала тадқиқотлари асосида яратилган.
Бундан ташқари, 1923 йилдан кейинги даврда Туркияда Ўзбекистон ҳақида ёзилган барча китоблар, мақолалар, битирув малакавий ишлар тизимли равишда жамланиб, таҳлил қилинди.
Китоб тақдимотидан сўнг хорижлик меҳмонлар архитектура факультетидаги музейда бўлиб, университет талабалари томонидан ясалган бинолар макетлари билан танишди.
