Yangi kitob: “O‘zbekiston: Davlat, jamiyat va migratsiya”
Samarqand davlat arxitektura-qurilish universitetida turkiyalik olimlar tomonidan yozilgan “O‘zbekiston: Davlat, jamiyat va migratsiya” kitobining taqdimoti o‘tkazildi.
Tadbirda universitet rektori Chidem Turkyilmaz, Turkiya Respublikasi ichki ishlar vazirligi ilmiy tadqiqotlar markazi (AREM) raisi Selim Chapar, Turkiya Respublikasining Samarqand shahridagi bosh konsuli Salih Janer, universitet professor-o‘qituvchilari va talabalar ishtirok etdi.
Mualliflar O‘zbekiston tarixi, madaniyati, siyosiy tizimi va migratsiya masalalariga oid tadqiqotlari, shuningdek, Samarqand, Buxoro, Xiva kabi shaharlarda olib borgan izlanishlari haqida fikrlarini bildirdilar.
Mazkur asar O‘zbekiston va Turkiya o‘rtasidagi ilmiy hamkorlikni yanada mustahkamlaydi, Turkiyada O‘zbekistonni tanitishda muhim rol o‘ynaydi.
- O‘zbekiston va Turkiya o‘zaro tarixiy ildizlar va madaniy meros bilan bog‘langan bo‘lib, siyosat, iqtisodiyot va ta’lim sohalarida faol hamkorlikni rivojlantirmoqda, - deydi universitet rektori Chidem Turkyilmaz. - “O‘zbekiston: davlat, jamiyat va migratsiya” kabi o‘zaro hamkorlikda olib borilgan ilmiy izlanishlar asosida yaratilgan asarlar turkiy xalqlar dunyosining birligini namoyon etadi va bilim almashinuviga hissa qo‘shadi.
O‘zbekiston turklarning O‘rxundan keyingi ikkinchi madaniy markazidir. U turk ma’rifatining markazi hamdir. Turklarning tarixda uchta madaniyat markazi bo‘lgan. Birinchisi O‘rxun. Turklar Katta Turkiston geografiyasini bosqichma-bosqich, O‘rxun hududiga asoslanib qurdilar.
Turklarning ikkinchi madaniy va iqtisodiy markazi skif turklari, oq hunlar va go‘kturklardan boshlangan jarayon bilan Movarounnahr va Qashqar geografiyasiga aylandi.
X asrdan boshlab turklar Anadoluni uchinchi iqtisodiy, madaniy va siyosiy tortishish markaziga aylantirdilar, bu esa Movarounnahr geografiyasiga asoslanib, sharqiy savdo yo‘lining eng chekka nuqtasi bo‘ldi. Turklarning uchta madaniy-ijtimoiy markazi mohiyatan bir-biridan oziqlanadi va bir-biri bilan qadimiy chambarchas bog‘liqdir.
- Bu kitob turklarning O‘rxundan keyingi ikkinchi madaniy markazi hamda turk ma’rifatining o‘rni bo‘lgan O‘zbekistonni davlat, jamiyat va ko‘chish sarlavhalari ostida o‘rganishni maqsad qilgan, - deydi Turkiya Respublikasi ichki ishlar vazirligi ilmiy tadqiqotlar markazi raisi Selim Chapar. - Nazariy va adabiy asosga ega bo‘lgan asar Turkiya va O‘zbekistonda olib borilgan dala tadqiqotlari asosida yaratilgan.
Bundan tashqari, 1923 yildan keyingi davrda Turkiyada O‘zbekiston haqida yozilgan barcha kitoblar, maqolalar, bitiruv malakaviy ishlar tizimli ravishda jamlanib, tahlil qilindi.
Kitob taqdimotidan so‘ng xorijlik mehmonlar arxitektura fakultetidagi muzeyda bo‘lib, universitet talabalari tomonidan yasalgan binolar maketlari bilan tanishdi.
