Янги йилдаги илк суҳбат: Юртимизда инсон азиз, унинг қадр-қиммати ҳар нарсадан улуғ

Янги йил муносабати билан бир неча кундан буён бир-биримизни табрикладик, эзгу тилакларимизни билдирдик. Яқинларимиз, дўстларимизга қўнғироқ қилдик, хабар юбордик. Яхшиям, телефон, интернет бор, бир-биримизга нисбатан меҳр-оқибатимиз йўқолиб кетмаганини шу воситалар орқали бўлса-да билдириб қўйдик. 

Ким билсин, инсон табиати шунақами, қанча қулайлик, енгиллик бўлса шунчалик эринчоқ, камҳаракат, ҳатто эътиборсиз бўлиб қоламиз. Авваллари кишилар бир-бирини йўқлаб, кўришиб, кўнгил сўраган, байрам, яхши кунда табриклаган бўлса, кейинчалик бу “хизмат”ни хат-хабар, телефон орқали билдириб қўйишга ўргандик. Бугун эса “йўқлов” янаям осон – қўлимиздаги смартфон (ақлли телефон-да бу) ёки интернетда битта матн ёзиб уни ҳаммага жўнатиб қўямиз. Буям замон зайли, кўпчиликни йўқлашнинг қулай усулидир. Аммо, кўришиб, ҳеч бўлмаганда, телефон орқали суҳбатлашиб, кўнгил сўрашнинг, байрам билан табриклашнинг ўрни бўлакча-да – юракдаги гаплар айтилади.

Кеча, умуман, Янги йил арафасида кўп қатори хабар ёзиб, телефон орқали дўсту қадрдонларни табриклаган бўлсам-да, бугун – 2022 йилнинг илк тонгида яқинларим, устозларга қўнғироқ қилиб уларга эзгу тилакларни билдирдим.

Навоийшунос олим, кўпчилик филолог ва журналистларнинг устози Муслиҳиддин Муҳиддиновга қўнғироқ қилиб, Янги йил билан табриклаганимда кўнгиллари очилиб, яхши гапларни айтдилар.

  – Йўқлаганингиз учун раҳмат, укажон. Ўзи бир неча кундан буён дилимда тугиб юрган гапларни журналист шогирдларим, дўстларимга айтсаму кўпчилик билан баҳам кўрсам, деган ниятда эдим. Яхши бўлди-да, – деди домла хурсанд бўлиб.

  – Айни вақтида қўнғироқ қилибманда унда, эшон бобо! Аслида, сиз билан суҳбатга биз кўпроқ ошиқишимиз керак, бунинг учун узр сўрайман, – дедим бироз хижолат бўлиб.

  – Узрга ҳожат йўқ, шогирдларнинг, дўстларнинг борига шукр, йўқлаб турибсизлар, кўнгил сўраяпсизлар – бундан бошим кўкка етади. Энди айтмоқчи бўлганим шуки, ёшим етмиш бешдан ошиб, ҳаётнинг кўп аччиқ-чучугини топиб, айни нуронийлик чоғимда арофимдаги инсонлардан кўраётганим бир томону, давлатимиз раҳбари томонидан кўрсатилаётган ҳурмат-эҳтиром бир томон бўляпти-да...

  Домла бироз жим қолиб, сўзида давом этди:

  – Хабарингиз бор, ҳурматли Шавкат Мирзиёевнинг қўлларидан “Ўзбекистон Республикасида хизмат кўрсатган ёшлар мураббийси” фахрий унвони ва “Эл-юрт ҳурмати” орденини олдим. Давлатимиз раҳбари Самарқандга келиб, фаоллар билан учрашганларида, албатта, ҳол-аҳвол сўрайдилар. Бир менга эмас, мен каби самарқандлик кўплаб нуронийларга, фаолларга муносабатлари шундай. Ўтган йил апрель ойида Самарқандга келганларини эсланг - икки кун вилоятимизнинг бир қатор ҳудудларида амалга оширилаётган ишлар билан танишиб, кейин раҳбарлар ва фаоллар билан Самарқандда амалга ошириладиган ишларни бир неча соат муҳокама қилган ва пойтахтга қайтиш олдидан, гарчи дастурда кўзда тутилмаган бўлса ҳам, ўша пайтда шифохонада бўлган Ўзбекистон Қаҳрамони, раҳматли Ҳасан Нормуродовдан бориб ҳол-аҳвол сўраган эдилар. Бу Президентимизнинг шу юртнинг бир фарзандига, демакки, бутун халқимизга бўлган ҳурмат, эҳтироми эмасми?

Қарангки, менга ҳам ана шундай бахт насиб этганидан доим Яратганга шукрона айтаман ва ҳурматли Президентимизнинг боши омон бўлишини, халқимизга бўлган чексиз меҳр-муҳаббати элимиз томонидан ҳам бундан-да зиёда ўзларига қайтишини сўрайман. Бундан бошқача ҳам бўлиши мумкин эмаслигини ўтган йил октябрь ойидаги сайлов ҳам яққол намоён этди, деб ўйлайман. Барчамиз, бутун халқимиз якдил бўлиб, Шавкат Мирзиёевни, у кишининг инсон қадри биринчи ўринга қўйилган ғоя ва ташаббусларини қўллаб-қувватладик.

“Гапим чўзилиб кетмаяптими, вақтингиз бемалолми, укажон” деб сўрайдилар домла мулоҳимлик билан. Мен эса кўнгил тўридаги бу гапларни эшитаётганимдан хурсандлигим ва телефоним хотирасида сақланаётгани, сўнгра буни устоз ўзлари айтганидек, кўпчиликка етказиш ниятида эканимни билдириб қўяман.

– Мени тўғри тушунганингиздан миннатдорман, – дея сўзида давом этади Муслиҳиддин домла. – Сизга аввал ҳам айтгандим, 9 май Хотира ва қадрлаш кунида, Иккинчи жаҳон уруши қатнашчилари билан бирга мен каби яна бир нечта нуронийларга ҳам Президентимиз табрик ва совға-салом йўллаган эдилар. Энди ўзингиз айтинг, қайси давлат раҳбари нуронийларига номма-ном табрик ва эзгу тилаклар ёзиб, уни ўз совғалари билан етказяпти? Дунё кенг, балки бордир, лекин шахсан мен билмайман, эшитмаганман буни. Уруш қатнашчилари, фахрийлар билан суҳбатлашинг, бу уларга қанчалик руҳ бериши, ҳаётга муҳаббатлари ошишини айтишади. Керак бўлса, умрларига умр қўшади. Мен буни жуда яхши ҳис қиламан.

Энди шу кеча-кундузда кўнглимдан кечганларини айтай. Уч кун олдин ҳокимликдан қўнғироқ қилиб, уйдаманми-йўқми – қизиқишибди ва меҳмон боришини айтишибди. Ким экан меҳмон, деб тараддудланиб тургандим, вилоятимиз ҳокими ва бошқа масъул кишилар хонадонимизга кириб келишди. Кутмагандим, жуда хурсанд бўлдим. Эшигингдан вилоят раҳбарлари сўраб келиб турса, эзгу ниятларини айтса, бошинг кўкка етади-да.

Ҳокимимиз жуда самимий инсон, барака топсин – Янги йил муносабати билан ҳурматли Президентимиз менга табрик йўллаганлари ва совға-салом юборганларини айтиб, у кишининг дил сўзларини ўқиб берди. Қалбимдаги фахр ва ғурур кўзимда қувонч ёшларини пайдо қилди. Кўнглим бирам кўтарилдики, асти қўяверасиз. Биласиз, кексалик туфайли бироз тобим йўқ. Аммо шу топда танимда ўзгача куч-ғайрат, шижоат пайдо бўлди. Меҳмонлар билан бироз суҳбатлашдик, мен ҳам уларга, Президентимизга эзгу тилакларимни билдирдим, кўнглимдаги туйғуларимни айтишга ҳаракат қилдим. Аммо ҳаяжон, қувонч билан ҳамма гапни ҳам айтолмадим. Шунинг учун бу гапларни сизга айтяпман, укажон!

Инсонни азиз, деб билиш, унинг қадрини улуғлаш шу эмасми?

– Албатта, бу Президентимизнинг халқимизга, юртимизда яшаётган ҳар бир инсонга бўлган жуда катта меҳр-муҳаббатлари ифодаси. Балки шунинг учун ҳам кеча давлатимиз раҳбари 2022 йилга “Инсон қадрини улуғлаш ва фаол маҳалла йили” деб ном беришни таклиф этгандирлар, – дедим домланинг фикларини маъқуллаб.

  – Менинг назаримда ҳам худди шундай. Аслида Сизга айтмоқчи бўлган гапларимнинг индаллоси шу – юртимизда инсон азиз, унинг қадр-қиммати ҳар нарсадан улуғ. Мен ўтган йил ноябрь ойида ҳурматли Шавкат Миромоновичнинг Президентлик ваколатини бажаришга киришиш маросимида иштирок этиб, у кишининг маърузаларини ўша ерда эшитгандим. Маърузада келгуси беш йилда Тараққиёт стратегияси асосида амалга ошириладиган ишлар марказида инсон, инсон қадри туриши айтилганди. Янги бошланган йилга танланган ном ана шу ҳаётий дастур бу йилдан бошлаб, ҳаётимизда ўз аксини топишидан далолат беради. Ана шу эзгу ғоя, олижаноб мақсадни амалга оширишда фақат Президент ёки раҳбарларга қараб қолмасдан, барчамиз ҳамжиҳат бўлишимиз, биргаликда ҳаракат қилишимиз зарур. Ўзимиз ўзгаришимиз, ҳаётимизни, ҳаётга қарашларимизни ўзгартиришимиз лозим.

– Устоз, эрталабдан кўнглингизни очиб, шунча гапларни айтганингиз учун катта раҳмат!

Ғолиб Ҳасанов.