Зарбанднинг йўли текисланиб, асфальт қилиняпти
17 август куни сайтимизда Иштихон туманида яшовчи Шуҳрат Юсупов имзоси билан “Зарбанд”нинг йўли асфальт “кўради”ми?" номли танқидий мақола босилди.
Унда кўтарилган муаммо бўйича Самарқанд вилояти автомобиль йўллари ҳудудий бошқармаси муносабат билдирди.
Ушбу жавобда шундай дейилади:
"Мурожаатда келтирилган йўл Самарқанд вилоят автомобиль йўллари ҳудудий бошқармаси таркибига кирувчи, Иштихон туман йўллардан фойдаланиш унитар корхонаси хизмат кўрсатадиган 4н-579 "Мойбулоқ-Зарбанд-Шовона" автомобиль йўлининг 22-39 километр оралиғи ҳисобланади.
Вилоят ҳокими Эркинжон Турдимов шу йилнинг 23 август куни Зарбандда ўтказган сайёр қабули давомида ҳам ушбу йўлни текислаш ва асфальт ётқизишга алоҳида эътибор қаратди, бу бўйича аниқ топшириқлар берди. Бугунги кунда ушбу йўлнинг 2,0 километрдан ортиқ қисмидаги асфальт йўл таъмирланди. Бу борадаги ишлар шу йилнинг сентябр ойи якуни билан тугатилади. Йўлнинг Зарбанд қишлоғидан ўтган 17 километр қисмининг таъмирлаш ишлари туман ободонлаштириш бошқармаси томонидан амалга оширилмоқда.
2021 йилда вилоят умумфойдаланувдаги автомобиль йўлларини жорий таъмирлаш дастури доирасида 85 млрд. сўм маблағ ўзлаштирилган бўлиб, шундан 10 млрд. сўми Иштихон тумани ҳиссасига тўғри келади.
Юқоридагиларга таянган ҳолда 4н-579 автомобиль йўлининг 34-39 километрлари оралиғи 2021 йилнинг сентябрь ойида амалга оширилади. Қолган 7 километр қисми дастур учун берилган маблағлар доирасида босқичма-босқич таъмирланади".
