Zarbandning yo‘li tekislanib, asfalt qilinyapti
17 avgust kuni saytimizda Ishtixon tumanida yashovchi Shuhrat Yusupov imzosi bilan “Zarband”ning yo‘li asfalt “ko‘radi”mi?" nomli tanqidiy maqola bosildi.
Unda ko‘tarilgan muammo bo‘yicha Samarqand viloyati avtomobil yo‘llari hududiy boshqarmasi munosabat bildirdi.
Ushbu javobda shunday deyiladi:
"Murojaatda keltirilgan yo‘l Samarqand viloyat avtomobil yo‘llari hududiy boshqarmasi tarkibiga kiruvchi, Ishtixon tuman yo‘llardan foydalanish unitar korxonasi xizmat ko‘rsatadigan 4n-579 "Moybuloq-Zarband-Shovona" avtomobil yo‘lining 22-39 kilometr oralig‘i hisoblanadi.
Viloyat hokimi Erkinjon Turdimov shu yilning 23 avgust kuni Zarbandda o‘tkazgan sayyor qabuli davomida ham ushbu yo‘lni tekislash va asfalt yotqizishga alohida e’tibor qaratdi, bu bo‘yicha aniq topshiriqlar berdi. Bugungi kunda ushbu yo‘lning 2,0 kilometrdan ortiq qismidagi asfalt yo‘l ta’mirlandi. Bu boradagi ishlar shu yilning sentyabr oyi yakuni bilan tugatiladi. Yo‘lning Zarband qishlog‘idan o‘tgan 17 kilometr qismining ta’mirlash ishlari tuman obodonlashtirish boshqarmasi tomonidan amalga oshirilmoqda.
2021 yilda viloyat umumfoydalanuvdagi avtomobil yo‘llarini joriy ta’mirlash dasturi doirasida 85 mlrd. so‘m mablag‘ o‘zlashtirilgan bo‘lib, shundan 10 mlrd. so‘mi Ishtixon tumani hissasiga to‘g‘ri keladi.
Yuqoridagilarga tayangan holda 4n-579 avtomobil yo‘lining 34-39 kilometrlari oralig‘i 2021 yilning sentyabr oyida amalga oshiriladi. Qolgan 7 kilometr qismi dastur uchun berilgan mablag‘lar doirasida bosqichma-bosqich ta’mirlanadi".
