Зомин семинарида Марказий Осиёнинг туркий тилли ёш ижодкорлари ҳам иштирок этди
Республика ёш ижодкорларининг “Зомин қалдирғочлари” семинари онлайн тарзда ўтказилди. Семинар масофавий тарзда ҳамда Марказий Осиёдаги туркий тилли ёш ижодкорлар, адабиёт ихлосмандларини қамраб олган ҳолда уюштирилди.
Zoom дастури асосида ташкил этилган семинарда Туркманистон, Қирғизистон, Тожикистон, Қозоғистон, Озарбайжон ва Афғонистон республикалари ёшлари ҳам иштирок этди.
Семинарда Ўзбекистон Ёзувчилар уюшмаси раиси, халқ шоири Сирожиддин Саййид, Жиззах вилояти ҳокими Эргаш Солиев, Ўзбекистон халқ шоирлари – Усмон Азим, Маҳмуд Тойирлар ёшларни ижод байрами билан қизғин табриклади.
Ёш ижодкорлар семинарида самарқандлик ёш қаламкашлар ҳам қатнашди.
Назм йўналишида Орифжон Комилов, Мавлуда Бойчаева, наср йўналишида, болалар адабиёти бўйича Тозагул Жуманова, бадиий публицистика йўналишида Абдуҳошим Зиётов, бадиий таржима бўйича Гулмира Сатторова иштирок этиб, семинарни уюшманинг вилоят бўлими биноси ва ўз уйларида кузатишди.
Устоз адиблар томонидан шуъбаларда олиб борилган мулоқотларда самарқандлик ижодкорларнинг ижодий ишлари юқори баҳоланди. Самарқанд ижод мактаби эътироф этилди. Шоира Зебо Мирзаева, ёзувчи Маъмура Зоҳидова бугун жўшқин ижод қилаётган ёшларимиздан Ҳумоюн, Бегали Эшонқулов, Алишер Сабрий, Камола Мусулмонова, Дадахон Муҳаммадиев, Феруза Хайруллаева, Гулҳаё Анорова кабиларнинг ўзига хос овози ва қалами ҳақида ҳам тўхталди.
Семинар иштирокчиларидан нурободлик шоира Мавлуда Бойчаеванинг ўзига хос, миллий ва халқона шеърлари, ташбеҳ ва образларига алоҳида урғу берилди. Орифжон Комиловнинг анча пишиқ ва фалсафий дидактик йўналишдаги шеърлари муносиб баҳоланди. Насрнинг оғир ва нозик жабҳаси - болалар адабиёти йўналишида ўзини синаб келаётган пайариқлик Тозагул Жуманованинг эртаклари жўшқин муҳокама ва эътирофларга сазовор бўлди.
Ёшлар анжумани онлайн тарзда ўтказилган бўлса-да, юртимиз ҳамда қардош мамлакатларнинг адабиётсевар ёшлари фаол иштирок этди, ўзаро дўстлашишди.
Ғолиблар тез кунларда аниқ бўлади ва барча қатнашчилар эсдалик совғалари билан тақдирланади.
Тошпўлат ТУГАЛОВ,
Ўзбекистон Ёзувчилар уюшмаси Самарқанд вилоят бўлими раҳбари.
