Akademik litseylarga qabul qachondan boshlanishi ma’lum bo‘ldi

Joriy yilning 20 iyunidan akademik litseylarda 2021/2022 o‘quv yili uchun o‘quvchilardan hujjatlarini qabul qilish boshlanadi. Bu haqda Oliy va o‘rta maxsus ta’lim vazirligi axborot xizmati xabar berdi.

Qayd etilishicha, o‘quvchilar, ularning ota-onasi yoki ota-onasining o‘rnini bosuvchi shaxslar akademik litseylarda tashkil etilgan Maslahat kengashlariga quyidagi hujjatlarni taqdim etishlari kerak:

- ta’lim yo‘nalishi, o‘quv tili, shakli ko‘rsatilgan ariza (chet tilidan saralash imtihoni topshirish belgilangan yo‘nalishlarda arizada qaysi chet tilidan saralash imtihonni topshirish hamda imtihonni o‘tkazish qoidalari bilan tanishganligi ko‘rsatiladi);

- shaxsni tasdiqlovchi hujjat (tug‘ilganlik haqidagi guvohnoma yoki pasport/ID-karta) nusxasi;

- 3,5x4,5 sm o‘lchamdagi 6 ta rangli fotosurat (oq fonda).

Bundan tashqari, hujjatlarni litsey.edu.uz portali orqali O‘zbekistondagi akademik litseylarga o‘quvchilar o‘zlari tanlagan yo‘nalishlar bo‘yicha onlayn topshirishlari ham mumkin bo‘ladi.

Shuningdek, o‘qishga imtiyozli kirish huquqiga ega bo‘lgan xalqaro va respublika olimpiadalari, tanlovlar, musobaqalar g‘oliblari asl nusxadagi diplom, sertifikat, guvohnoma yoki boshqa tasdiqlovchi hujjatlarni ham topshiradilar.

Ma’lumot uchun: hujjatlarni qabul qilish 30 iyunga qadar davom etadi.