Ali Qushchi ilmiy merosi dunyo olimlari nigohida

Avval xabar berganimizdek, bugun Samarqand davlat universitetida “Ali Qushchi – Mirzo Ulug‘bek ilmiy maktabining buyuk elchisi” nomli xalqaro ilmiy konferensiya bo‘lib o‘tmoqda.
Anjumanda O‘zbekiston Fanlar akademiyasi prezidenti Bekzod Yo‘ldoshev, Matematika instituti direktori Shavkat Ayupov, Astronomiya instituti direktori Shuhrat Egamberdiyev, shuningdek, Boku davlat universiteti rektori Elchin Boboyev, Rossiya kvant markazi direktori Ruslan Yunusov, AQSh, Turkiya, Xitoy, Koreya, Hindiston va boshqa davlatlardan kelgan olimlar ishtirok etmoqda.
So‘zga chiqqanlar Mirzo Ulug‘bek va Ali Qushchining ilmiy maktabi va merosi haqida ma’ruzalar qildi.

Samarqand davlat universiteti rektori Rustam Xolmurodov AQShning Dallasdagi Texas universiteti Nanotexnologiya instituti direktori o‘rinbosari Anvar Zohidovga universitetning “Faxriy professori” unvonini topshirdi.
Kunning ikkinchi yarmida konferensiya ishi sho‘balarga bo‘lingan holda o‘tkazildi. Xalqaro ilmiy konferensiya ishi ertaga ham davom etadi.