Antaliyaning yashirin xazinalari haqida eshitganmisiz?
Turk Riviyerasining go‘zal shahri - Antaliya o‘zining iliq harorati, betakror sohillari, qadimiy shaharlari va dam olish maskanlari bilan mashhur. Shuningdek, bu yerda kishini hayratda qoldiradigan xazinalari ham bor.
Ormana qishlog‘i: eng yaxshi xalq me’morchiligi namunalari
Toros tog‘lari etagidagi eski “Yörük” (ko‘chmanchi) qishlog‘i - Ormanani Antaliyaning yashirin marvaridi, deyish mumkin. BMT turizmi tomonidan “2024 yilning eng yaxshi sayyohlik qishloqlari” ro‘yxatida e’tirof etilgan bu kichik qishloq o‘zining yam-yashil landshaftlari va o‘ziga xos muhiti bilan jannatning bir parchasidir. Ormana haqiqiy turk qishloq hayotini aks ettiruvchi noyob joy. Qishloq o‘zining tugmali uylari bilan mashhur bo‘lib, ular hech qanday ohaksiz faqat tosh va sadr yog‘ochlari yordamida qurilgan. Qishloqda 60 yildan buyon har sentyabr oyida “Chavush” navli uzumni nishonlash uchun festival o‘tkaziladi.
Oltinbeshik g‘ori: geologik mo‘’jiza
Urunlu qishlog‘ida joylashgan Oltinbeshik g‘ori Antaliyaning tengsiz tabiat mo‘’jizalaridan biri. Oltinbeshik milliy bog‘ining bir qismi bo‘lgan ushbu g‘orda Turkiyaning eng katta yer osti ko‘li joylashgan bo‘lib, unda ko‘zni qamashtiruvchi stalaktitlar, stalagmitlar va muzli travertinlar mavjud. Shuningdek, g‘or atrofida 605 turdagi o‘simlik turlari hamda boy yovvoyi tabiat, jumladan, endemik turlarga ega bo‘lgan Milliy bog‘ bor.
Ximera: fantastik tabiat hodisasi
Eng qiziqarli tabiat hodisalaridan biri bo‘lgan olovli qoyalar joylashgan Ximerada yerdan chiqadigan metan gazi atmosferaga aralashib, hech qachon o‘chmaydigan alangaga aylangan. Bu yerdagi qoyalar Olimpos Beydag‘lari milliy bog‘ining bir qismidir. Afsonaga ko‘ra, qahramon Bellerofont o‘zining qanotli oti Pegas yordamida olovli, uch boshli yirtqich hayvon Ximerani o‘ldirgan va uni toshga aylantirgan. Shu sababli, Ximeraning abadiy alangasi bu yirtqich hayvon olovining qoldiqlari ekanligi haqida afsonalar aytiladi.
Uchansu sharsharalari: Sent-Pol yo‘lidagi yashirin voha
Antaliyaning mashhur hashamatli golf o‘ynash joyi Belekdan 60 kilometr uzoqlikda joylashgan Uchansu sharsharalari ham yashirin xazinalardan biridir. Toros tog‘idan kelayotgan suv ikki sharsharaga bo‘linib, har biri 25-30 metr balandlikdan ko‘kalamzor yerlarga quyiladi. Bu yerda Qirol hovuzi deb nomlanuvchi kichikroq tabiiy hovuz ham bor. Uchansu sharsharalari Turkiyaning ikkinchi eng uzun piyoda yo‘li bo‘lgan Sankt-Pol yo‘lining bir qismidir. Ilk nasroniylikning yetakchi missionerlaridan biri Avliyo Pavlusning izidan boradigan yo‘l bu yerga boruvchilarga qadimiy xarobalar, an’anaviy qishloqlar va qo‘l tegmagan tabiiy muhitni o‘rganish imkoniyatini beradi.
Zilola tayyorladi.
