Ayrim ko‘chalarda transport vositalarining harakati vaqtincha cheklanadi

Samarqand shahar hokimining tegishli farmoyishiga ko‘ra, 5 avgustdan 14 avgustga qadar soat 06:00 dan 20:00 gacha oliy ta’lim muassasalariga kirish uchun o‘tkaziladigan test sinovlari munosabati bilan Samarqand shahrining quyidagi ko‘chalarida transport vositalarining harakati vaqtincha cheklanadi:

— Turkiston ko‘chasinining Samarqand turizm texnikumi oldidagi tutashmasidan 5-mikrorayonga kirish yo‘li tutashmasigacha bo‘lgan qismida;

— Kimyogarlar qo‘rg‘oni Umid ko‘chasining Ziyolilar ko‘chasi bilan kesishgan chorrahasidan Madaniyat saroyi oldidagi maydongacha bo‘lgan qismida;

— Islohot ko‘chasining Rudakiy ko‘chasi bilan tutashmasidan, «Lokomotiv» stadioniga kirish darvozasigacha hamda Gagarin ko‘chasigacha bo‘lgan qismida;

— Depo ko‘chasining Arman ko‘chasi bilan tutashmasidan, «Lokomotiv» stadionining kirish darvozasigacha bo‘lgan qismida.

Samarqand shahar hokimligi axborot xizmati.