Bayram munosabati bilan "Afrosiyob" poyezdining qo‘shimcha 4 ta reysi yo‘lga qo‘yiladi

Fuqarolarimizning Yangi yil bayramini munosib kutib olish va dam olish kunlarida yurtimizning diqqatga sazovor joylariga sayohat qilib, maroqli hordiq chiqarishlariga imkoniyat yaratish maqsadida “O‘zbekiston temir yo‘llari” AJ tomonidan "Toshkent — Samarqand — Toshkent" yo‘nalishida harakatlanadigan №764/763 — “Afrosiyob” poyezdining qo‘shimcha 4 ta reysi yo‘lga qo‘yiladi. Bu haqda “O‘ztemiryo‘lyo‘lovchi” AJ  xabar berdi.

Mazkur reyslar 2019 yil 30, 31 dekabr hamda 2020 yil 1, 2 yanvar kunlari amalga oshiriladi.

"Imtiyozli bo‘lgan chiptalarni faqat temiryo‘l kassalarida xarid qilishingiz mumkin. Elektron chiptalarda belgilangan chegirmalar rasmiylashtirilmaydi.

Qo‘shimcha ma’lumotni Toshkent shahridagi 1005 qisqa telefon raqami, joylardagi temir yo‘l kassalari hamda ma’lumotlar byurosidan bilib olishingiz mumkin", deyiladi xabarda.