Bu hafta yomg‘ir yog‘adi, harorat pasayadi

O‘zgidrometning ma’lum qilishicha, 27 oktyabrda respublikaning shimoliy hududlariga Kavkaz hududlari ustida shakllangan nam havo massalari kirib kelishi boshlanadi. Qoraqalpog‘iston va Xorazm viloyatida ba’zi joylarda biroz yomg‘ir yog‘ishi mumkin.

Mamlakatning qolgan hududlarida quruq ob-havo saqlanib turadi, yuqori va quyi qavat bulutlari hosil bo‘ladi.

Payshanba kuni yomg‘irli zona sharqqa siljiydi va respublikamizning tog‘ oldi va tog‘li hududlariga yaqinlashganda yog‘ingarchilik kuchayadi. Qoraqalpog‘iston, Xorazm va Farg‘ona vodiysidan boshqa hududlarda yomg‘ir yog‘adi.

Juma kuni markaziy va sharqiy hududlarda, shuningdek respublikaning tog‘ oldi va tog‘li hududlarida yomg‘ir yog‘ishi kutilmoqda.

27-28 oktyabrda esa respublika bo‘yicha ba’zi joylarda shamol tezligi 15-20 m/s gacha kuchayishi mumkin.

Hafta davomida harorat kechalari +4...+9 daraja atrofida bo‘ladi, kunduz kunlari esa harorat asta-sekin pasayadi va haftaning oxiriga kelib, kunduz kungi harorat +7…+12 darajagacha pasayadi.