Dastlabki ma’lumot: Avtobusda yo‘lovchilar bo‘lmagan, haydovchi shifoxonada
Joriy yilning 26 dekabr kuni ijtimoiy tarmoqda "Samarqand shahar, Gagarin ko‘chasida avtobus ag‘darildi" sarlavhasi ostidagi xabar tarqaldi.
Dastlabki ma’lumotlarga ko‘ra, joriy yilning 26 dekabr kuni soat 05:30 larda, Samarqand viloyati, Samarqand shahar, Gagarin va Fitrat ko‘chalari kesishmasida yo‘lovchi tashuvchi avtobus va “Niva” rusumli transport vositalari ishtirokida to‘qnashuv sodir bo‘lib, avtobus ag‘darilgan.
To‘qnashuv oqibatida yo‘lovchi tashuvchi avtobus haydovchisiga birinchi tez tibbiy yordam ko‘rsatish maqsadida shifoxonaga olib ketilgan. Avtobusda yo‘lovchilar bo‘lmagan.
O‘zbekiston Respublikasi IIV YHXBB axborot xizmati xabariga ko‘ra, mazkur hodisa yuzasidan Samarqand shahar IIB YHXB tomonidan surishtiruv ishlari olib borilib, to‘qnashuv sabablariga aniqlik kiritilmoqda.
