Gazeta o‘qishdan to‘xtaydigan jamiyat savodsizlikka yuz tutadi

Globallashuv va axborot yangi texnologiyalari davrida matbuotning o‘rni qanday bo‘lishi kerak? Matbuotga ehtiyoj qanday shakllanadi? Bugun mamlakatdagi gazeta va jurnallar jamoalari qanday muammolarga duch kelmoqdalar? Bugungi bosh muharrir ijodkormi yoki menejer? Gazeta uslubi qanday shakllanadi?

Viloyat Matbuot uyida "Ishonch" va "Ishonch-Doveriye" gazetalari bosh muharriri, O‘zbekistonda xizmat ko‘rsatgan jurnalist, Oliy Majlis Senati a’zosi Husan Ermatov bilan ana shu savollar atrofida muloqot bo‘ldi. Viloyat "Zarafshon" va "Samarkandskiy vestnik" gazetalari tahririyati bosh muharriri Farmon Toshev o‘z tajribalari bilan o‘rtoqlashdi, gazetachilikdagi  muammolar sabablari xususida fikr yuritdi.

Tadbirda ishtirok etgan jurnalistlar ham masala yuzasidan o‘z nuqtai nazarini bildirib, ko‘p savollarga javob olishdi.

—Tahririyatimiz bir necha yildan beri konvergeyt tahririyat sifatida faoliyat yuritmoqda, - dedi Husan Ermatov. - Ya’ni,  ijtimoiy tarmoqlar, telegram, yutub, instagram kabi platformalarda o‘z sahifalarimizga egamiz. Misol uchun, telegram kanalimizda 100 mingdan ziyod o‘quvchimiz, yutubda 50 mingga yaqin kuzatuvchimiz bor. Muxbirlarimizning videokontent tayyorlashi uchun ham barcha sharoitlarni yaratganmiz. Ammo har qanday holatda  ham gazetalar o‘qishligi, sifatini saqlab qolishga urinamiz. Gazetada axborotlardan qochib, asosan tahliliy maqolalar beramiz. Gazeta o‘qishdan to‘xtaydigan jamiyat savodsizlikka yuz tutadi.

Uchrashuvda samarqandlik ommaviy axborot vositalari xodimlari shu masalada o‘zlarini qiziqtirgan fikr mulohazalarini bildirishdi.