Газета ўқишдан тўхтайдиган жамият саводсизликка юз тутади

Глобаллашув ва ахборот янги технологиялари даврида матбуотнинг ўрни қандай бўлиши керак? Матбуотга эҳтиёж қандай шаклланади? Бугун мамлакатдаги газета ва журналлар жамоалари қандай муаммоларга дуч келмоқдалар? Бугунги бош муҳаррир ижодкорми ёки менежер? Газета услуби қандай шаклланади?

Вилоят Матбуот уйида "Ишонч" ва "Ишонч-Доверие" газеталари бош муҳаррири, Ўзбекистонда хизмат кўрсатган журналист, Олий Мажлис Сенати аъзоси Ҳусан Эрматов билан ана шу саволлар атрофида мулоқот бўлди. Вилоят "Зарафшон" ва "Самаркандский вестник" газеталари таҳририяти бош муҳаррири Фармон Тошев ўз тажрибалари билан ўртоқлашди, газетачиликдаги  муаммолар сабаблари хусусида фикр юритди.

Тадбирда иштирок этган журналистлар ҳам масала юзасидан ўз нуқтаи назарини билдириб, кўп саволларга жавоб олишди.

—Таҳририятимиз бир неча йилдан бери конвергейт таҳририят сифатида фаолият юритмоқда, - деди Ҳусан Эрматов. - Яъни,  ижтимоий тармоқлар, телеграм, ютуб, инстаграм каби платформаларда ўз саҳифаларимизга эгамиз. Мисол учун, телеграм каналимизда 100 мингдан зиёд ўқувчимиз, ютубда 50 мингга яқин кузатувчимиз бор. Мухбирларимизнинг видеоконтент тайёрлаши учун ҳам барча шароитларни яратганмиз. Аммо ҳар қандай ҳолатда  ҳам газеталар ўқишлиги, сифатини сақлаб қолишга уринамиз. Газетада ахборотлардан қочиб, асосан таҳлилий мақолалар берамиз. Газета ўқишдан тўхтайдиган жамият саводсизликка юз тутади.

Учрашувда самарқандлик оммавий ахборот воситалари ходимлари шу масалада ўзларини қизиқтирган фикр мулоҳазаларини билдиришди.