Hafta davomida qanday ob-havo kuzatiladi?

Gidrometeorologiya xizmati markazi hafta davomida O‘zbekistonda kutilayotgan ob-havo haqida ma’lumot berdi.

Qayd etilishicha, bugun, 3 fevral kuni O‘zbekiston hududiga Kavkaz tumanlaridan nisbatan salqin va nam havo oqimi kirishni boshlagan.  Kechasi Qoraqalpog‘istonda va Xorazm viloyatida, ertalab Buxoro, Navoiy, Samarqand, Qashqadaryo viloyatlarining ayrim joylarida yomg‘ir yog‘ib o‘tdi. Kun davomida yog‘ingarchilik zonasi asta-sekin butun respublika hududiga tarqaladi, faqat Farg‘ona vodiysi viloyatlarida quruq ob-havo saqlanib turadi.

Respublikamizning ayrim joylarida shamolning tezligi soniyasiga 15-20 metrgacha kuchayadi. Havo harorati o‘tgan dam olish kunlariga nisbatan 7-10 darajaga pasayib, 5-8 daraja iliqni tashkil qiladi. Bu fevral oyining boshi uchun xos bo‘lgan o‘rtacha ko‘p yillik qiymatlardan 2-4 darajaga pastdir.

Ertaga, 4 fevral kechasi va ertalab Toshkent, Andijon, Namangan, Farg‘ona viloyatlarida kuchsiz yog‘ingarchilik bo‘ladi. Respublikaning qolgan joylarida ob-havo yog‘ingarchiliksiz bo‘lib, harorat yana ko‘tarila boshlaydi. Ertaga kunduzi havo 9-12 darajagacha iliydi.

Keyinchalik xorijiy janubdan juda iliq va quruq havoning chiqishi kuchayadi. Harorat foni yana ko‘tariladi va haftaning oxiriga borib, 17-20 darajaga yetadi. Bunday harorat me’yordan 8-10 darajaga yuqori bo‘lib, fevral boshi uchun xos emas.