Ichki ishlar xodimlari va sotuvchilar o‘rtasida janjal yuzaga keldi
Toshkent shahar Yunusobod tumanida 13 dekabr, yakshanba kuni ichki ishlar xodimlari va fuqarolar o‘rtasida mojaro kelib chiqqani aks etgan video tarqaldi. Poytaxt ichki ishlar bosh boshqarmasi mazkur holat yuzasidan rasmiy munosabat bildirdi.
Ma’lum qilinishicha, taxminan soat 15:00 da Yunusobod tumani IIO FMB 5-ichki ishlar bo‘limi profilaktika inspektorlari, podpolkovnik Sh.Alimqulov va kapitan D.Majidovlar “Universam” savdo kompleksi yaqinidagi yerosti yo‘lagida noqonuniy savdo bilan shug‘ullanuvchi va bu bilan boshqa fuqarolar uchun noqulayliklar tug‘diruvchi shaxslarga nisbatan chora ko‘rish haqidagi ko‘plab murojaatlardan so‘ng voqea joyiga yetib kelib, yerosti yo‘lagida savdo mollarini terib qo‘ygan ayol, erkak va yigitni ko‘rishdi.
Ushbu shaxslar noqonuniy savdoni to‘xtatib, savdo mollarini yig‘ishtirish va yo‘lakni fuqarolar uchun bo‘shatish to‘g‘risidagi ogohlantirishlarga rad javobini berishdi. Savdo qoidalarini buzish uchun qonun bilan belgilangan javobgarlik haqidagi ogohlantirishlarga ayol va erkak qo‘pol tarzda javob berib, boshqa huquqni muhofaza qiluvchi organlarga murojaat qilishlarini aytgan.
Bundan tashqari, ular janjal ko‘tarib atrofdagilarning e’tiborini tortgan, ularning o‘g‘li esa xizmat burchlarini ado etayotgan ichki ishlar organlari xodimlari bila mushtlashmoqchi bo‘lgan. Voqea joyiga patrul-post xizmati xodimlari yetib kelishganda ham yigit huquqbuzarlikni bas qilmasdan patrul-post xizmati xodimining yuziga urgan.
Shu sababli xodimlar yigitning qo‘llariga kishan solishga majbur bo‘lishgan va uch nafar tartibbuzarlarning shaxsini aniqlash va keyingi surishtiruvlar uchun 5-IIBga olib ketilgan. Yerosti yo‘lagida noqonuniy savdo qiluvchi shaxslar tomonidan kelib chiqqan tartibbuzarlik va noqulayliklardan norozi bo‘lgan o‘ndan oshiq hodisa guvohlari ko‘rsatma berish maqsadida ichki ishlar bo‘limiga ixtiyoriy ravishda yetib kelgan.
Huquqbuzarlar Navoiy viloyatilik 43 yoshli Akromjon va 42 yoshli Xolisxon Turdiyevalar va ularning o‘g‘li - 19 yoshli Abdurahim Xidirov ekanligi aniqlandi.
Ayni paytda hodisa yuzasidan tergovoldi tekshiruvi o‘tkazilmoqda.
