IIV Samarqand akademik litseyida “Namunali o‘qituvchi” ko‘rik-tanlovi g‘oliblari taqdirlandi

O‘zbekiston Respublikasi Ichki ishlar vazirligining Samarqand akademik litseyida, viloyat ichki ishlar boshqarmasi rahbariyatining tashabbusi bilan litseyda faoliyat olib borayotgan o‘qituvchilar o‘rtasida “Namunali o‘qituvchi” ko‘rik-tanlovi g‘oliblarini taqdirlash marosimi bo‘lib o‘tdi.

Tanlov Davlat ta’lim standartlari talablari asosida yangi pedagogik texnologiyalarni dars jarayonlarida muvaffaqiyat bilan qo‘llayotgan, tashabbuskor, jamoada namuna ko‘rsatayotgan o‘qituvchilarni munosib rag‘batlantirish maqsadida o‘tkazildi.

Tadbirda viloyat IIB boshlig‘i o‘rinbosari, podpolkovnik Farhod Xatamov litsey o‘quvchilarini chuqurlashtirilgan va kasbga yo‘naltirilgan holda o‘qitish, ularni vatanparvarlik ruhida tarbiyalashda litsey pedagogik jamoasining bilimi va mehnatini e’tirof etdi.

Tanlovning yakuniy natijalariga ko‘ra, 1-o‘ringa ingliz tili fani o‘qituvchisi Samariddin Mannobov, 2-o‘ringa rus tili fani o‘qituvchisi Yulduz Narzullayeva, 3-o‘ringa chaqiruvga qadar boshlang‘ich tayyorgarlik fani o‘qituvchisi Orziqul To‘raqulov loyiq deb topilib, boshqarmaning diplom va esdalik sovg‘alari bilan taqdirlandi.

Samarqand viloyati ichki ishlar boshqarmasi axborot xizmati.