Ipoteka krediti asosida uy-joy xarid qilishda subsidiya olish uchun qancha ariza topshirilgan?

Bu borada 2019 yil 28 noyabrda Prezidentimizning “Ipoteka krediti mexanizmlarini takomillashtirishga oid qo‘shimcha chora-tadbirlar to‘g‘risida”gi farmoni qabul qilingan. Hujjatda jismoniy shaxslarga ipoteka krediti berishning zamonaviy bozor tizimini shakllantirish, uy-joyga muhtoj oilalarni davlat tomonidan qo‘llab-quvvatlashda manzillilik va shaffoflikni kuchaytirish maqsadida bir qator vazifalar belgilab berilgan.

Jumladan, farmonga asosan kam ta’minlangan va uy-joy sharoitlarini yaxshilashga muhtoj bo‘lganlarga ipoteka krediti bo‘yicha dastlabki badal va (yoki) foizlarning bir qismini qoplash uchun davlat byudjeti mablag‘lari hisobidan subsidiyalar to‘lanadi.

Buning uchun joriy yil 1 martdan boshlab davlat xizmatlari markazlari yoki Yagona interaktiv davlat xizmatlari portali orqali ariza berilishi kerak.

Davlat xizmatlari markazlari tomonidan fuqarolar tomonidan jami 2829 ta ariza qabul qilingan. Subsidiya bo‘yicha shahar (tuman) hokimliklarida tuzilgan maxsus komissiyalar tomonidan 867 ta arizalar ijobiy deb topilgan. 1240 ta arizalar rad etilgan.

Eslatib o‘tamiz, arizalar joriy yilning 1 oktyabriga qadar qabul qilinadi.