IT Village - IT sohasi, dasturlash ishiga qiziquvchi o‘quvchilar uchun zamonaviy ilm maskani
2022 yil oktyabr oyida «Yagona integrator – UZINFOCOM» markazi bilan hamkorlikda ishlab chiqilgan loyiha asosida Nurobod tumanidagi Oqsoy qishlog‘ida IT Village majmuasi tashkil etilgan edi. Bugun ushbu majmua bo‘ylab press-tur tashkil etildi.
- Go‘zal manzarali va toza havoga ega tog‘ yonbag‘irlarida joylashgan ushbu IT qishlog‘i respublikaning chekka hududlarida IT infratuzilmasini tashkil etish, yaqin hududlardagi bolalarni ilg‘or IT-texnologiyalariga qiziqtirish va o‘qitish imkonini beradi, - deydi IT Village loyihasi menejeri Bobur Sa’dullayev. – Bu bolalar uchun bepul ta’lim beruvchi yirik ijtimoiy loyihalardan biridir. Shu bois bu yerga maktab yoshigacha bo‘lganlar ham, o‘quvchilar ham kelib, bemalol majmuadagi mavjud dasturlash tillarini o‘rganishlari mumkin.
Press-tur davomida ommaviy axborot vositalari xodimlari majmuada IT olamiga qiziquvchi o‘quvchilar hamda o‘qituvchilar uchun yaratilgan sharoitlar bilan tanishdi. Majmuada 3 ta o‘quv xonasi, 8 o‘rinli turarjoy, 15 kishilik konferens-zal, tibbiyot punkti, eko-kinoteatr mavjud. Ta’kidlanishicha, IT Village majmuasi shu yilning 1 iyunidan boshlab o‘z o‘quv yilini boshlaydi. Maqsad – o‘quvchilarning ta’tildagi bo‘sh vaqtini samarali o‘tkazish. Bepul kurslar va bepul avtobus qatnovi yo‘lga qo‘yiladi. IT texnologiyalari, dasturlash, veb-dizayn, robototexnikalar bo‘yicha kurslar tashkil etiladi.
Jurnalistlar press-tur davomida xorijda 25 yil davomida tajriba orttirgan, IT olamida mashhur va tajribali mutaxassis Shavkat Karimov ishtirokida o‘quvchilar bilan sohaga oid davra suhbati va master-klassni kuzatishdi. Shuningdek, “Uz domen” ma’muriyatining ilg‘or tadqiqot loyihalarini ishlab chiqish xizmati dasturchisi Manuchehr Usmonov bu borada qimmatli fikrlarini bildirdi.
Jasur ShUKUROV.
