Jomboyda “Spark” haydovchisi ikki ayolni urib yubordi, ulardan biri vafot etgan

2019 yil 22 dekabr kuni taxminan soat 23:30 larda haydovchi 30 yoshli A.Z. boshqaruvidagi “Spark” rusumli avtomashinasini Samarqand viloyati Jomboy tuman Sarichashma MFY hududidan o‘tuvchi 4R48 avtomobil yo‘lining 4 kilometrida “Eshimoqsoq- Jomboy” yo‘nalishi bo‘yicha boshqarib borayotgan vaqtida yo‘lni kesib o‘tayotgan piyodalar 30 yoshli F.R. va Z.R.larni urib yuborib, yo‘l-transport hodisasi sodir qilgan.

Oqibatda piyoda F.R. turli darajadagi tan jarohatlari olib, tuman tibbiyot birlashmasiga olib ketilayotganida vafot etgan. Z.R. esa og‘ir tan jarohatlari bilan tuman tibbiyot birlashmasiga yotqizilgan.

Mazkur holat yuzasidan Jomboy tumani IIB huzuridagi tergov bo‘limi tomonidan O‘zbekiston Respublikasi Jinoyat kodeksining 266-moddasi 2-qismi (odam o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.

O‘zbekiston Respublikasi IIV huzuridagi tergov departamenti xabariga ko‘ra, hozirda ushbu jinoyat ishi bo‘yicha dastlabki tergov xarakatlari olib borilmoqda.