Litsey bitiruvchilariga diplom topshirildi
Samarqand davlat universitetida mazkur dargohning akademik litseyi bitiruvchilariga diplom topshirish marosimi bo‘lib o‘tdi.
Tadbirda universitet rektori R.Xolmurodov joriy yilgi bitiruvchilar orasida xalqaro olimpiadalar g‘olib va sovrindorlari, jahon reytingida “TOP-500” talikka kirgan xorijiy oliy o‘quv yurtida o‘qish imkoniyatiga ega bo‘lgan yoshlarning borligi qolgan litsey o‘quvchilariga o‘rnak bo‘lishini ta’kidladi.
- Akademik litseyimizni bitirgan 431 nafar o‘quvchining 15 nafari a’lo darajali diplom bilan tugatdi, - deydi litsey direktori Azamat Umarov. - Ularning 10 nafari nufuzli xalqaro oliy o‘quv yurtlarining talabasiga aylangan bo‘lsa, 14 nafari xorijiy tillar bo‘yicha IELTS sertifikatiga, 18 nafari esa CEFR darajalarini qo‘lga kiritdi.
12 nafar bitiruvchi Respublika fan olimpiadasining viloyat bosqichida sovrindor bo‘ldi, 40 nafari respublika va xalqaro onlayn-olimpiadalarda faxrli o‘rinlarni qo‘lga kiritdi.
- Mazkur bilim dargohida tajribali ustozlarimdan fan sirlarini chuqur o‘rganishga harakat qildim, - deydi Janubiy-Sharqiy Osiyo mamlakatlari o‘rtasida o‘tkazilgan «SEAMO-2020» xalqaro onlayn-olimpiadasi finalchisi Muhammad Temirxonov. – Bu esa o‘zbekistonlik yoshlarning bilimlari boshqalardan kam emasligini ko‘rsatdi. Bu natijam endi oliy o‘quv yurti talabasi bo‘lib, yanada yuqoriroq marralarni egallashimga turtki bo‘ladi. 
Tadbirda bitiruvchilarning ota-onalari, ularning ustozlari ham so‘zga chiqib, yoshlarning kelgusida Yangi O‘zbekistonning barpo etuvchi haqiqiy mutaxassislarga aylanishlarini tilab, omad tiladi.
Dilmurod To‘xtayev.
