"Markaziy Osiyoning “yangi javohiri”: BBC Samarqand haqida maqola chop etdi

Buyuk Britaniyaning yetakchi ommaviy axborot vositasi – BBC Samarqandni Markaziy Osiyoning “yangi javohiri” deb e’tirof etdi.

Nashr jurnalisti o‘z maqolasida Samarqand haqidagi o‘z taassurotlarini bayon qilib, unda yangidan barpo etilgan “Silk Road Samarkand” majmuasi ham tilga olingan.

“Silk Road Samarkand” turizm majmuasi – Amir Temur orzu qilgani kabi ulug‘vordir. Sakkizta osmono‘par zamonaviy, hashamatli mehmonxonalar va sog‘lomlashtirish markazlari binolari, bir qator chempionlarni tarbiyalagan eshkak eshish sportida foydalanilgan keng kanal atrofida to‘plangan”, deyiladi maqolada.

Shuningdek, shaharning Shohi Zinda kabi tarixiy binolari, bozorlar va zamonaviylikka uyg‘un mashhur sayyohlik markazlari haqida so‘z yuritiladi.

BBC muxbiri mamlakatda olib borilayotgan islohotlarni ham qayd etib o‘tgan. Maqolada u sud-huquq tizimini isloh qilish, iqtisodiyotni liberallashtirish hamda ochiqlik va bag‘rikenglik siyosati bilan yangi O‘zbekistonning barpo etilayotganligini qayd etgan.

“Bir paytlar millionlab o‘zbeklarni (jumladan, bolalarni) dalaga paxta terimiga majburlagan majburiy mehnatga to‘liq barham berilgan”, deyiladi maqolada.

Maqola bilan ushbu havolada to‘liq tanishib chiqishingiz mumkin.