Meva-sabzavotni qayta ishlashda Italiya tajribasi o‘rganilmoqda
Viloyatimizning Samarqand, Jomboy, Bulung‘ur, Toyloq hamda Urgut tumanlari bog‘dorchilikka ixtisoslashgan.
Katta maydonlarda mevali bog‘lar hamda uzumzorlar barpo etilgan. Shuningdek, poliz va sabzavotchilik bo‘yicha ham ilg‘or tajribalarga tayangan holda agrotexnik tadbirlar amalga oshirilib, samaradorlik oshirilmoqda.
Ushbu yo‘nalishda sohani yanada rivojlantirish maqsadida xalqaro ekspert hamda mutaxassislar bilan o‘zaro hamkorlik ishlari ham samarali yo‘lga qo‘yilgan. “O‘zbekistonda meva-sabzavotchilik texnologiyalari bo‘yicha texnik ko‘mak” loyihasi ana shulardan biri.
Mazkur loyihaning terimdan keyingi tadbirlar bo‘yicha xalqaro eksperti italiyalik Rujjero Malossi, mahalliy ekspertlar N.Xalilov hamda B.Mirzohidov Akademik M.Mirzayev nomidagi bog‘dorchilik uzumchilik va vinochilik ilmiy tadqiqot instituti – Samarqand ilmiy tajriba stansiyasida bo‘ldi.
Yilning to‘rt faslida ham bozorlarimiz rastalarini meva-sabzavot mahsulotlari bilan to‘lishi, mevalarni terimdan keyin qayta ishlash amaliyotlariga ham bog‘liq. Loyiha eksperti Rujjero Malossi aynan ushbu sohada ko‘p yillik tadqiqot olib borgan tajribali mutaxassislardan biri hisoblanadi.
Akademik M.Mirzayev nomidagi bog‘dorchilik uzumchilik va vinochilik ilmiy tadqiqot instituti – Samarqand ilmiy tajriba stansiyasi ilmiy xodimlari, dehqon va fermer xo‘jaliklari mutaxassislari bilan o‘tkazilgan seminar-treningda xorijlik ekspert “Yangi uzilgan meva-sabzavotlarni terimdan keyin qayta ishlash amaliyotlariga oid talablar” mavzusidagi ma’ruzasi bilan ishtirok etdi.
Ma’ruzada ishtirokchilarga meva-sabzavotlarni terimdan keyin qayta ishlash amaliyotlariga oid barcha ma’lumotlar, tavsiyalar ko‘rgazmali slayd shaklida taqdim etildi. Treningda xorij tajribalari bilan yaqindan tanishildi va o‘zaro fikr almashildi. Kelgusida bu kabi treninglarni yanada kengroq auditoriyalar va dala maydonlarida tashkil etishga kelishib olindi.
– Meva-sabzavotchilikning barqaror rivojlanishida mahsulot yetishtirishning ilg‘or texnologiyalarini qo‘llash, mahsulotni qayta ishlash va saqlashning zamonaviy usullarini joriy qilish bugungi kunda oziq-ovqat tanqisligining oldini olish imkonini beradi, – deydi ilmiy tajriba stansiyasi xodimi O‘rmonbek Mirzoxidov. – Ma’lumki, yetishtirilgan meva-sabzavot mahsulotlari iste’molchiga tayyor mahsulot ko‘rinishida yetib borguncha bir qator texnologik jarayonlardan o‘tadi. Aynan ushbu jarayonlarni to‘g‘ri tashkil etish esa mahsulotning sifati yo‘qolmasligi, uning eksportbop bo‘lishiga xizmat qiladi.
Eksport esa o‘z navbatida O‘zbekiston iqtisodiyoti uchun samarali rivojlanish manbai sanaladi. Mahsulot va xizmatlarni ishlab chiqarish va boshqa mamlakatlarga sotish yurtimizning yanada taraqqiy topishi va turmush tarzining o‘sishida muhim ahamiyat kasb etadi.
Davron JAMOLOV.
