Mutolaa: Nima bo‘ladi? Fantastik hikoya. Frederik Braun
- Janoblar, qarshingizda birinchi va yagona vaqt mashinasi, - deya e’lon qildi professor Jonson ikki hamkasbiga. - Bu ishlaydigan model xolos, lekin u ham og‘irligi uch funt besh unsiya bo‘lgan narsalarni o‘n ikki daqiqaga o‘tmishga yoki kelajakka ko‘chirishga qodir.
Mashina chindan ham kamtarona ko‘rinardi, u platforma va ikkita katta siferblatdan iborat edi.
Professor qo‘liga katta metall kubni oldi.
- Biz bir funt va unsiyaning uchdan ikki qismi og‘irlikdagi bu misdan qilingan kub bilan tajriba o‘tkazdik, - dedi u. - Hozir men uni kelajakka, besh daqiqa oldinga yuboraman.
U siferblatlardan birini ustiga egilib, millarni harakatga keltirdi.
- Iltimos, vaqtga e’tibor bering.
Hamkasblar bir vaqtda soatlariga nazar tashlashdi. Professor Jonson ehtiyotkorlik bilan kubni platformaga joyladi va u shu zahotiyoq g‘oyib bo‘ldi.
Kub soniyasigacha roppa-rosa besh daqiqadan so‘ng oldingi joyida paydo bo‘ldi.
Professor kubni ohista qo‘liga oldi.
- Endi men uni besh daqiqa o‘tmishga jo‘nataman, - U boshqa siferblatdagi o‘tkazgichni harakatga keltirib soatiga qaradi. – Hozir uchgacha olti daqiqa bor. Men mashinani roppa-rosa soat uchga sozlab qo‘ydim. Demak, beshtakam uchda kub mening qo‘limdan g‘oyib bo‘ladi va men uni u yerga qo‘yishimdan besh daqiqa oldin platformada paydo bo‘ladi.
- Qanday qilib bu holatda uni u yerga qo‘yishingizga aqlim yetmayapti, - dedi mehmonlardan biri.
- Qo‘limni platformaga yaqinlashtirganim bilan kub yo‘qoladi va uni joylashtirishim uchun paydo bo‘ladi. Qarang!
Haqiqatan ham, kub uning kaftidan g‘oyib bo‘ldi va vaqt mashinasi platformasida paydo bo‘ldi.
- Ko‘rdingizmi? Uni platformaga qo‘yishim kerakligidan besh daqiqa oldin u allaqachon shu yerda.
Ikkinchi hamkasbi peshonasini burishtirib, o‘ylanib qoldi.
- Mabodo, siz hozir platformada turgan kubni joyiga qo‘yish fikridan qaytsangiz, qo‘yishdan besh daqiqa oldin, unda nima bo‘ladi. Paradoks hosil bo‘larmikan?
- Qiziq... – dedi professor Jonson. – Men haqiqatan ham bunday holat to‘g‘risida o‘ylab ko‘rmaganman. Keling urinib ko‘ramiz. Demak, men...
Paradoks hosil bo‘lmadi. Mis kubi joyida qoldi.
Ammo professor, uning hamkasblari g‘oyib bo‘ldi...
Bahora Muhammadiyeva tarjimasi.
