Oqdaryodagi oshxonada sodir bo‘lgan chaqnash oqibatida 10 kishi jarohatlangan
Viloyat favqulodda vaziyatlar boshqarmasi Oqdaryo tumanining Navro‘z mahallasida sodir bo‘lgan chaqnash bo‘yicha ma’lumot berdi.
Ta’kidlanishicha, bugun, 19 dekabr kuni soat 14:20 da mazkur mahallaning Amir Temur ko‘chasida joylashgan “Lazzat” oshxonasida chaqnash sodir bo‘lgan (voqea joyida 2 ta propan gaz balloni bo‘lgan).
Chaqnash oqibatida oshxonaning taxminan 40 kvadrat metr maydonida shift qismi va jihozlar yongan.
Birlamchi ma’lumotga ko‘ra, 10 nafar fuqaro tan jarohati olib, tuman shifoxonasiga olib borilgan.
Yong‘in-qutqaruv ekipaji soat 14:23 da hodisa joyiga yetib borib, 14:29 da yong‘in qurshab olingan va soat 14:54 da o‘chirilgan.
Voqea joyiga viloyat hamda tuman favqulodda vaziyatlar bo‘limi rahbar-xodimlari, IIB, prokuratura, tibbiyot, gaz ta’minoti korxonasi mutaxassislari va 2 ta yong‘in-qutqaruv ekipaji jalb etilgan.
Sodir bo‘lgan holat yuzasidan tergovoldi surishtiruv ishlari olib borilmoqda.
