O‘zbekistondagi yangi avtozavod 2020 yildan mahsulot ishlab chiqaradi
2019 yil 19 aprel kuni Namangan viloyati To‘raqo‘rg‘on tumanida tijorat avtomobillari va avtobuslar ishlab chiqarishga ixtisoslashgan “Hyundai Motor Uz Namangan” mas’uliyati cheklangan jamiyat shaklidagi O‘zbekiston-Koreya qo‘shma korxonasi qurilish ishlarini boshlanishiga bag‘ishlangan tantanali marosim o‘tkazildi. Bu haqida viloyat hokimligi Axborot xizmatiga tayanib human.uz xabar berdi.
Marosimda Koreya Respublikasi ishbilarmonlari, Namangan viloyati hokimligi, davlat va jamoat tashkilotlari, ommaviy axborot vositalari vakillari ishtirok etdi. Namangan viloyati hokimi Xayrullo Bozarov va “Evergreen Motors” kompaniyasi bosh direktori Kim Chang Keon tantanali ravishda ramziy tugmachani bosishi bilan korxonaga asos solinishi sanasi va boshqa muhim ma’lumotlar solingan kapsula inshoot poydevori qo‘yiladigan joydan o‘rin oldi. Ushbu loyihaga 2019-2021 yillar davomida 200 mln AQSh dollari miqdorida investitsiya kiritiladi va keyingi 4 yil davomida mahalliylashtirish darajasi 45 foizga yetkaziladi. Avtozavod 2020 yilning 1-choragidan ilk mahsulotlarini chiqara boshlaydi.
