Qo‘shrabot va Nurobod tumanlarida ikkita yangi buyurtma qo‘riqxona tashkil etiladi
Bu bo‘yicha normativ-huquqiy hujjatlar loyihalari muhokamasi portalida “Samarqand viloyatida “Fozilmon” hamda “Cho‘nqaymish” davlat muhofaza etiladigan buyurtma qo‘riqxonalarini tashkil etish chora-tadbirlari to‘g‘risida”gi hukumat qarori loyihasi e’lon qilindi.
Loyihada Ekologiya qo‘mitasi, Kadastr agentligi, O‘rmon xo‘jaligi davlat qo‘mitasi, Samarqand viloyati hokimligining;
tabiatni muhofaza qilish davlat muassasasi shaklida Samarqand viloyati Qo‘shrabot tumanida 24 000 gektar bo‘lgan “Fozilmon” hamda Samarqand viloyati Nurobod tumanida 4 600 gektar bo‘lgan “Cho‘nqaymish” davlat buyurtma qo‘riqxonalarini tashkil etish to‘g‘risidagi takliflariga rozilik berilishi ko‘rsatib o‘tilgan.
Belgilanishicha:
a) buyurtma qo‘riqxonalar O‘rmon xo‘jaligi qo‘mitasi tuzilmasiga kiradi;
b) davlat buyurtma qo‘riqxonalari faoliyati Vazirlar Mahkamasi qarori bilan tasdiqlangan O‘rmon xo‘jaligi qo‘mitasi to‘g‘risidagi nizomga muvofiq moliyalashtiriladi;
v) davlat buyurtma qo‘riqxonalari joriy xarajatlarini moliyalashtirish hamda byudjetdan moliyalashtiriladigan shtat birliklarini saqlash O‘rmon xo‘jaligi qo‘mitasi tizimidagi yer maydonlari qisqartirilayotgan davlat o‘rmon xo‘jaliklari tegishli mablag‘larini hamda shtat birliklarini maqbullashtirish hisobidan hamda belgilangan me’yorlarga asosan amalga oshiriladi.
g) davlat buyurtma qo‘riqxonalari hududidagi tabiiy majmualar va landshaftlar, noyob va yo‘qolib ketish xavfi ostida bo‘lgan o‘simlik va hayvonot turlari muhofazaga olinadigan asosiy ob’yektlar hisoblanadi.
