Samarqand shahri yana bir xalqaro tadbirga mezbonlik qiladi
27-28 oktyabr kunlari Samarqand shahrida ilk bor Mustaqil Davlatlar Hamdo‘stligi (MDH) Parlamentlararo Assambleyasining sessiyasi bo‘lib o‘tadi.
Parlament yuqori palatasi ma’lumotiga ko‘ra, tadbirda MDH PA ishtirokchi davlatlari parlamentlari delegatsiyalari rahbarlari va a’zolari, shuningdek, xalqaro tashkilotlar vakillari, olim va ekspertlar ishtirok etadi.
Ertaga, 27 oktyabr kuni Assambleyaning madaniyat, axborot, turizm va sport bo‘yicha, agrar siyosat, tabiiy resurslar va ekologiya bo‘yicha hamda siyosiy masalalar va xalqaro hamkorlik bo‘yicha doimiy komissiyalarining majlislari bo‘lib o‘tadi.
Shu kunning o‘zida Hamdo‘stlik mamlakatlari parlamentlarining yosh a’zolari MDH ishtirokchi davlatlari Yoshlar parlamentlararo assambleyasi majlisiga yig‘iladi. Shuningdek, MDH PA Kengashining majlisi bo‘lib o‘tadi. Parlament delegatsiyalari rahbarlari hamkorlikning dolzarb masalalarini muhokama qiladi, 2022 yilda o‘tkazilgan tadbirlar yakunlarini sarhisob qiladi, MDH makonidagi saylov kampaniyalari monitoringi to‘g‘risidagi axborotni eshitadi.
28 oktyabr kuni MDH PAning 54-yalpi majlisi bo‘lib o‘tadi. Parlament a’zolari saylov mavzusidagi ko‘plab namunaviy qonunlarni ko‘rib chiqishi rejalashtirilgan. Shuningdek, deputatlar va senatorlarga bir qator boshqa qonun loyihalari ham taqdim etiladi, ulardan keyinchalik Hamdo‘stlik mamlakatlarining milliy qonunchiligida foydalanish mumkin.
Sessiyaning asosiy tadbirlari arafasida 25 oktyabr kuni MDH ishtirokchi davlatlari Parlamentlararo Assambleyasi va Aloqa sohasidagi mintaqaviy hamdo‘stlik Ekspertlar kengashining majlisi bo‘lib o‘tadi.
