Samarqandda 5 ta xonadonda yong‘in yuz berdi

Kecha, 26 iyul kuni soat 14:50 larda Samarqand shahar Shohi Zinda ko‘chasida yong‘in sodir bo‘lgan. Viloyat favqulodda vaziyatlar boshqarmasi ushbu yong‘in yuzasidan ma’lumot berdi.

Ma’lum qilinishicha, soat 14.58 da boshqarmaga Samarqand shahar Shohi Zinda ko‘chasidagi 242-uyda yong‘in sodir bo‘layotgani haqida xabar tushgan.

Olingan xabarga asosan hodisa yuz berayotgan joyga 5 ta yong‘inga qarshi bo‘linma jalb etilgan.

Yong‘in sodir bo‘layotgan xonadonga birinchi bo‘linma soat 15:04 da yetib borgan. Kuchli shamol natijasida yong‘in tezda katta maydonga tarqalgan. FVB bo‘linmalari yetib borganda 5 ta xonadonning taxminan 200 metr kvadrat maydonida shift va tom qismi hamda uy jihozlari yonayotgan bo‘lgan.

Tezkor harakatlar natijasida yong‘in soat 15:39 da o‘rab olinib, 17:00 da o‘chirilgan. Hodisa oqibatida hech kim jarohat olmagan. Hozirda yong‘inning sababi va zarari aniqlanmoqda.