Samarqandda professional ta’lim muassasalariga kirish test sinovlari bo‘lib o‘tmoqda

2023-2024-o‘quv yili uchun professional ta’lim muassasalari (kollej va texnikum)ga kirish test sinovlari 2023 yil 26 sentyabrdan buyon 2 smenada o‘tkazilmoqda.

Test sinovlari Samarqand shahri, Ishtixon, Kattaqo‘rg‘on va Paxtachi tumanlarida tashkil etildi. Viloyatdagi kollej va texnikumlarga 12 778 nafar abituriyentlar hujjat topshirgan. Bugungi kunga qadar abituriyentlarning 6931 nafari test sinovlarida ishtirok etgan. Ayrim sabablarga ko‘ra 2716 nafar abituriyent imtihonga kelmagan. 6 nafar abituriyent test sinovlari qoidalarini buzganligi uchun imtihondan chetlatilgan.

Test sinovi kasb va mutaxassislikka mos 2 ta fan va barcha test topshiruvchilar uchun majburiy bo‘lgan 3 ta fan (ona tili, matematika, O‘zbekiston tarixi)dan tuzilgan. Unda talabgorlarga mutaxassislik fanlaridan 30 tadan, majburiy fanlardan 10 tadan jami 90 ta test topshirig‘i va ularni ishlash uchun 3 soat vaqt ajratilyapti.

Test sinovlarida to‘plash mumkin bo‘lgan maksimal ball – 189 ball bo‘lib, har bir to‘g‘ri javob uchun:

1-mutaxassislik fanida — 3,1 balldan (jami 93 ball);

2-mutaxassislik fanida — 2,1 balldan (jami 63 ball);

majburiy fanlarda — 1,1 balldan (jami 33 ball) beriladi.

Test sinovlari 30 sentyabrga qadar davom etadi.