Samarqandda Rossiya universiteti filialiga o‘qishga kiruvchilardan imtihon olindi

Joriy yilning 21-23 sentyabr kunlari Rossiya davlat jismoniy tarbiya, sport, yoshlar va turizm universiteti Samarqand filialiga 2020-2021 o‘quv yilida o‘qishga qabul qilish bo‘yicha kasbiy (ijodiy) imtihonlar o‘tkazildi.

Bu oliy ta’lim muassasasiga o‘qishga kirish uchun avvalo rus tilida suhbat o‘tkazildi. So‘ngra Samarqand shahridagi “Dinamo” stadionida yengil atletika, “Lokomativ” stadionida esa tennis bo‘yicha imtihonlar bo‘lib o‘tdi.

Sportning o‘yin turlari va yengil atletika bo‘yicha ixtisoslashtirilgan bolalar-o‘smilar sport maktabida basketbol, voleybol, gandbol turlaridan imtihon topshirdi. Sportning futbol yo‘nalishi bo‘yicha hujjat topshirgan yoshlar Samarqand shahridagi 2-bolalar-o‘smirlar sport maktabida sinovdan o‘tdi.

Eslatib o‘tamiz, filialda ta’lim-tarbiya olish istagida hujjat topshirgan abituriyentlardan 150 nafari o‘qishga qabul qilinadi. Shulardan 45 nafari davlat granti, 105 nafari to‘lov-shartnoma asosida o‘qishi belgilangan.