SamDTI Boltiq Federal universiteti bilan hamkorlik memorandumini imzoladi

Samarqand davlat tibbiyot universiteti delegatsiyasi Kaliningraddagi Boltiq Federal universitetida bo‘ldi. Ilmiy va akademik hamkorlik doirasida universitet rektori Aleksandr Fedorov bilan uchrashuv bo‘lib o‘tdi.

Uchrashuvda universitetlar o‘rtasida akademik mobillik bo‘yicha hamkorlik qilish shartnomasi imzolandi. Ushbu hamkorlik memorandumiga asosan ilmiy tadqiqotlar olib borish va ilmiy maqolalarni birgalikda nashr etish, tibbiy ta’limning barcha yo‘nalishlari bo‘yicha tajriba almashish, ilmiy va ta’lim loyihalarida birgalikda ishtirok etish, o‘qituvchilarning amaliyot, malaka oshirish va boshqa ta’lim tadbirlarini tashkil qilishga kelishib olindi.

Samarqand davlat tibbiyot universiteti delegatsiyasi tarkibidagi professor-o‘qituvchilar hamkorlik doirasida oliy tibbiyot maktabining talabalariga ma’ruzalar va amaliyot darslari o‘tishdi.

Shuningdek, akademik mobillik doirasida universitetning 6 nafar talabasi Boltiq Federal universiteti bazasida kanikulyar maktabda o‘qishdi va sertifikatga ega bo‘ldi.

Universitetlar o‘rtasidagi akademik hamkorlik ta’lim sifatini, professor-o‘qituvchilar va bitiruvchilarning xalqaro ta’lim xizmatlari va mehnat bozorida raqobatbardoshligini oshirishga xizmat qiladi.

G.Samiyeva.