Sog‘lom bo‘lishning beshta oddiy va samarali usuli
Jahon sog‘liqni saqlash tashkiloti tahliliga ko‘ra, keyingi o‘n yilda dunyo bo‘yicha kattalar o‘rtasida jismoniy faollik darajasi 5 foizga pasaygan. Bu shunday davom etsa, 2030 yilgacha kamharakatlik ko‘rsatkichi 35 foizgacha oshishi prognoz qilinyapti.
Xo‘sh, bu muammoning oddiy va oqilona yechimi bormi?
- Ba’zilar jismoniy faollik uchun ko‘p vaqt, maxsus maydon, sport kiyimlari va kuchli iroda kerak, degan noto‘g‘ri tasavvurga ega, — deydi Respublika ixtisoslashtirilgan kardiologiya ilmiy-amaliy tibbiyot markazi Qashqadaryo filiali direktori Yashin Ahmadov. — Aslida esa buning uchun istak va harakatning o‘zi kifoya.
Og‘ir jismoniy mashqlarga har qanday organizm ham dosh bera olmaydi. Qolaversa, qator kasalliklarda bunday zo‘riqish organizm uchun zararli. Shunday ekan, muammoning oqilona yechimi — kundalik tizimli harakatda.
Quyida har kunlik jismoniy faollik uchun eng oson va ommabop usullarni keltirib o‘tamiz.
1-usul: 20 daqiqalik yengil yuklama.
Jamoat transportida manzilingizdan bir bekat oldin tushing. Avtomobil haydasangiz, mashinani ishxonangizdan uzoqroq joyga qo‘ying. Shu tariqa ko‘proq piyoda yurish imkoniyati tug‘iladi.
Yuqori qavatlarga liftda emas, piyoda ko‘tarilishga odatlaning. Ish yoki o‘qishga kelishda 10 daqiqa, qaytishda 10 daqiqa yayov yurishni yo‘lga qo‘ysangiz, bu organizm uchun kunlik 20 daqiqa yengil kardioyuklama hisoblanadi.
2-usul: 30 daqiqa qoidasi.
Jahon sog‘liqni saqlash tashkiloti haftasiga kamida 150 daqiqadan iborat o‘rtacha jismoniy faollikni tavsiya qiladi.
Bu me’yorni haftaning 5 kuniga 30 daqiqadan taqsimlash mumkin. Shunda alohida sport mashg‘uloti bilan shug‘ullanish shart bo‘lmaydi. Tez yurish, uy mehnati, bolalar bilan o‘ynash orqali ushbu yuklamani oson uddalaysiz.
3-usul: har soatda 5 daqiqa ajrating.
Har soatda kamida 5 daqiqa harakat qilish tavsiya etiladi: o‘rningizdan turing, biroz xona yoki yo‘lak bo‘ylab harakatlaning. Qomatni rostlang. 10 marta o‘tirib-turish mashqini bajaring. Bu usul diqqat va ish unumdorligini oshirishga ham xizmat qiladi.
4-usul: ham muloqot, ham hordiq.
Do‘stu yaqinlar bilan muloqot uchun sayrni tanlang. Oilaviy dam olish uchun esa velosayohat yoki stol tennisi o‘yini juda maqbul.
5-usul: texnologiyalar — dastyoringiz bo‘lsin.
Turli mobil ilovalarni qo‘llash va harakat haqida eslatmalarni yoqish, fitnes-trekerlar orqali kunlik faollikni kuzatish sog‘lik uchun foydali.
Kuniga 10 ming qadam yurish majburiy me’yor emas. Ammo bu ko‘rsatkich sizni sog‘lom hayot uchun yo‘naltiruvchi ajoyib marra hisoblanadi. Unutmang, katta natijalar kichik qadamlardan boshlanadi.
Sog‘liqni saqlash vazirligi axborot xizmati.
