Turkiya 2025 yilning ilk choragida rekord darajada daromad oldi: xorijlik sayyohlar mamlakatda o‘rtacha 11 kun qolgan

Turkiya turizm sohasida 2025 yilning birinchi choragidagi natijalarini e’lon qildi. Unga ko‘ra, 2025 yilning 1 yanvaridan 31 martigacha 8,844 million xalqaro sayyohni qabul qilib, turizmdan rekord darajada - 9,5 milliard dollar daromad oldi.

Bu haqda Turkiya Madaniyat va turizm vaziri Mehmet Nuri Ersoy Istanbulda o‘tkazilgan matbuot anjumanida ma’lum qildi.

“Birlashgan Millatlar Tashkilotining turizm ma’lumotlariga ko‘ra, Turkiya 2024 yilda dunyoning to‘rtinchi eng katta turizm bozori sifatida qayd etildi. O‘tgan yili dastlab 60 million xalqaro sayyohni qabul qilishni maqsad qilgan edik, lekin yilni rekord darajadagi 62,2 million kishi bilan yakunladik. Maqsadimiz 2025 yil oxirigacha 65 million sayyohni qabul qilish va turizmdan 64 milliard dollar daromad olishdir. Aprel va undan keyingi davrlardan kutilgan natijalar va 2025 yilning dastlabki uch oyida turizmda daromadimizning 5,6 foizga oshishi maqsadlarimizga erishish yo‘lida ekanligimizdan dalolatdir”, - dedi Mehmet Nuri Ersoy.

2025 yilning dastlabki uch oyida 733 ming eronlik, 601 ming rus, 572 ming nemis, 560 ming bolgar va 304 ming ingliz fuqarosi Turkiyaga kelgan. Bu ziyoratchilar Turkiyada o‘rtacha 11 kecha qolib, bir kechaga taxminan 98,90 AQSh dollari sarflagan.
O‘zbekistondagi turizm natijalari bilan solishtirish va xulosa qilishga arziydigan raqamlar-a, nima dedingiz?