Urgutda oilalarga necha kilodan, qanday mahsulotlar tarqatilishi aytildi

Urgut tumani “URG-GAZ KARPET” MChJ homiyligida mahalla va oilani qo‘llab-quvvatlash bo‘limining homiylik xayriyalarini muvofiqlashtirish markazi tomonidan shakllantirilgan ro‘yxat asosida tumandagi 600 ta kam ta’minlangan va ehtiyojmand oilalarga tarqatiladigan mahsulotlar tayyorlab qo‘yildi.

Ushbu mahsulotlar tarkibida 3000 litr (har bir oilaga 5 litrdan) o‘simlik moyi, 30 tonna (50 kilogramdan) un, 3 tonna (5 kilogramdan) guruch, makaron, kartoshka, sabzi, 1 tonna (2 kilogramdan) go‘sht, novvot, mosh, 36 ming dona (2 fleykadan) tuxum, 5000 dona (10 tadan) sovun va bir martalik tibbiy niqoblar bepul tarqatilishi boshlandi. Tarqatilayotgan mahsulotlar tuman sanitariya-epidemiologik osoyishtalik markazi va veterenariya bo‘limi oziq-ovqat xavfsizligi xizmati xodimlari tomonidan o‘rganilib, qat’iy nazoratga olindi.

Ijtimoiy tarmoqlarda tarqatilayotgan xayr-ehsonlar yuzasidan ba’zi salbiy fikrlar bildirilayotgan bir paytda Urgut tumani mutasaddilari bu haqda ma’lumotlarni aniq berishi ko‘plab tushunmovchiliklarning oldini oladi.