Urgutning Shirvoq ota mahallasida yangi kutubxona ochildi
Muhimi, bu kutubxonani tashkil etishning tashabbuskori - yoshlar.
Bu ezgu ishning boshida Shirvoq ota mahallasi yoshlar yetakchisi Qosim Nafasov ekanligini eshitib, quvondik. Mazkur tashabbus yoshlar ma’naviyatini yuksaltirish, kitobxonlikni keng targ‘ib qilish hamda mahalla aholisining bo‘sh vaqtini mazmunli tashkil etishga xizmat qilishi bilan ahamiyatli.
- Kutubxonaning faoliyati yo‘lga qo‘yilishida mahallamiz raisi Sharif Hamdamov, mahalla faollari, shuningdek 50-maktab jamoasi, xususan, direktorning ma’naviy-ma’rifiy ishlar bo‘yicha o‘rinbosari Rasulberdi Mamatovning ko‘magi katta bo‘ldi, - deydi Q.Nafasov.
Darhaqiqat, ularning hamjihatligi, mahalla va ta’lim maskanlari o‘rtasidagi hamkorlik ushbu ezgu tashabbusning tezda amalga oshishiga zamin yaratdi.
Kecha ushbu kutubxonaning muxtasargina ochilish marosimi bo‘lib o‘tdi. Tadbirda O‘zbekiston Yozuvchilar uyushmasi viloyat bo‘limi rahbari Toshpo‘lat Tugalov, shoir Muhammadrizo Abdurahmonov, xalq ta’limi a’lochisi Abdunazar Yo‘ldoshev, mahalla faollari, o‘qituvchilar, nuroniylar, yoshlar hamda keng jamoatchilik vakillari ishtirok etdi. Ishtirokchilar yoshlarga ma’naviy ozuqa beruvchi, ularni fikrlashga undovchi bunday maskanlarning ahamiyatini ta’kidlab, kutubxona kelgusida mahallaning madaniy hayotida muhim o‘rin egallashiga ishonch bildirdilar.
Mazkur kutubxona yoshlar uchun bilim manbai, ma’naviyat o‘chog‘i, yangi g‘oyalar tug‘ilib, iste’dodlar kamol topadigan makonga aylanishi shubhasiz.
