Беларус сиртдан 30 йилга озодликдан маҳрум этилган собиқ президент Қурманбек Бакиевни Қирғизистонга қайтаришдан бош тортди
Беларус Олий суди ҳукми сиёсий сабабларга кўра таъқиблар билан боғлиқ бўлгани сабабли собиқ президент Қурманбек Бакиевни Қирғизистонга экстрадиция (давлат қонунларини бузган шахсни хорижий давлатга расмий равишда топшириш) қилишдан бош тортди. Бу ҳақда «Кабар»га Қирғизистон Республикаси Бош прокуратураси маълум қилди, дея хабар беради Azattyq Rýhy.
Назорат органига кўра, собиқ президент суднинг 2016 йил 29 июлдаги қарори билан 2010 йил 7 апрель воқеалари ва бошқа жиноий эпизодлар учун 30 йилга озодликдан маҳрум этилган эди.
Назорат органи таъкидлаганидек, улар Беларус Бош прокуратурасига Бишкек гарнизони ҳарбий суди ва Ҳарбий суднинг маъмурий ҳуқуқбузарликлар бўйича жиноий ишлар бўйича судлов ҳайъати ҳукмларини тан олиш ва Беларусда ижро этиш тўғрисида илтимоснома юборишди. Шунингдек, Бош прокуратура Бакиевни жиноий жавобгарликка тортиш учун экстрадиция қилиш бўйича тўртта сўров юборган.
Эслатиб ўтамиз, 2005 йилда Қирғизистонда президент Асқар Ақаевнинг истеъфосини талаб қилиб, оммавий мухолифат намойишлари бўлиб ўтган эди. Бу воқеалар «Лола инқилоби» деб номланди. 2005 йил 24 мартда Асқар Акаев ўз хавфсизлиги учун мамлакатни тарк этишга мажбур бўлди. Бош вазир Қурманбек Бакиев муддатидан олдин президентлик сайловларигача муваққат давлат раҳбари лавозимида ишлаган ва сайловда ғалаба қозонган. 2009 йил 23 июлда мамлакатда янги президентлик сайловлари бўлиб ўтди ва унда амалдаги давлат раҳбари ғалаба қозонди. Шу тариқа, Қурманбек Бакиев Қирғизистон президенти лавозимини иккинчи муддатга – 2009-2014 йилларда эгаллаган.
2010 йил баҳорида Қурманбек Бакиев истеъфосини талаб қилиб мухолифатнинг оммавий намойишлари бошланди. 2010 йил 7 апрелда мухолифатчилар ва Ички ишлар вазирлиги ўртасидаги тўқнашувлар қуролли инқилобга айланди. Натижада Қурманбек Бакиев мамлакатни тарк этишга мажбур бўлди. Ўша йилнинг 19 апрелидан бери Қурманбек Бакиев Беларусда бўлиб, президент Александр Лукашенко унга сиёсий бошпана берган эди.
