Маҳмудхўжа Беҳбудий қадами етган “Бахшитепа” масжиди қачон таъмирланади?
Каналимизда 2024 йилнинг 9 июль куни “Маҳмудхўжа Беҳбудий қадами етган манзил йўқолиб кетадими?” сарлавҳали танқидий мақола эълон қилинган эди.
Мана, бир йилдан ошдики, мақолага вилоят маданий мерос бошқармаси на муносабат билдирди, на масжид таъмирланди.
Тойлоқ туманининг Бахшитепа маҳалласидаги XIX-XX асрларга тегишли “Бахшитепа” масжиди ҳозир авария ҳолатида турибди ва ундан фойдаланилмайди. Объектнинг том, фасад қисмлари таъмирталаб ҳолатга келиб қолган.
2013 йилдан буён шу маҳаллага раислик қилиб келаётган Хурсанд Исрофилованинг таъкидлашича, масжидни ҳашар ёки ҳомийлар ёрдами билан таъмирлашга рухсат берилмаган.
Бу йил ўзбек драматургиясининг асосчиси, жадидчилик ҳаракатининг раҳнамоси Маҳмудхўжа Беҳбудийнинг 150 йиллиги нишонланмоқда.
Буюк маърифатпарвар бобомиз яшаб ўтган, унинг қадами етган манзил таъмирланса, нафақат тарихий меросимиз сақланиб қолинади, балки келажак авлод учун ҳам хизмат қилади.
