Mahmudxo‘ja Behbudiy qadami yetgan “Baxshitepa” masjidi qachon ta’mirlanadi?

Kanalimizda 2024 yilning 9 iyul kuni “Mahmudxo‘ja Behbudiy qadami yetgan manzil yo‘qolib ketadimi?” sarlavhali tanqidiy maqola e’lon qilingan edi.

Mana, bir yildan oshdiki, maqolaga viloyat madaniy meros boshqarmasi na munosabat bildirdi, na masjid ta’mirlandi.
Toyloq tumanining Baxshitepa mahallasidagi XIX-XX asrlarga tegishli “Baxshitepa” masjidi hozir avariya holatida turibdi va undan foydalanilmaydi. Ob’yektning tom, fasad qismlari ta’mirtalab holatga kelib qolgan.
2013 yildan buyon shu mahallaga raislik qilib kelayotgan Xursand Isrofilovaning ta’kidlashicha, masjidni hashar yoki homiylar yordami bilan ta’mirlashga ruxsat berilmagan.
Bu yil o‘zbek dramaturgiyasining asoschisi, jadidchilik harakatining rahnamosi Mahmudxo‘ja Behbudiyning 150 yilligi nishonlanmoqda.
Buyuk ma’rifatparvar bobomiz yashab o‘tgan, uning qadami yetgan manzil ta’mirlansa, nafaqat tarixiy merosimiz saqlanib qolinadi, balki kelajak avlod uchun ham xizmat qiladi.