Муфтий Усмонхон Алимов Қозоғистонга ташриф буюрди
Бугун, 12 апрель куни Қозоғистон мусулмонлари идорасининг янги биносининг очилиш маросими бўлиб ўтди. Унда Ўзбекистон мусулмонлари идораси раиси, муфтий Усмонхон Алимов ҳазратлари, Қирғизистон мусулмонлари идораси раиси, муфтий Максатбек Токтомушев, шунингдек, Россия, Хитой, Молдова ва Финляндия мусулмонлари етакчилари қатнашди. Бу ҳақда Ўзбекистон Мусулмонлар идораси матбуот хизмати хабар бераяпти.
Маросимда мусулмонлар идорасининг янги биносининг таркибий тузилмаси, яратилган шарт-шароитлар, меҳмонлар билан мулоқот қилиш хоналари, кўргазма заллари ва келгусида амалга оширилиши режалаштирилган лойиҳалар ҳақида маълумотлар берилди.
Ўзбекистон мусулмонлари идораси раиси, муфтий Усмонхон Алимов ҳазратлари очилиш маросимида сўзга чиқиб, ушбу муҳташам ва файзли бино билан Қозоғистон мусулмонлари идораси раҳбариятини қутлаб, кўп йиллар мўмин-мусулмонлар хизматида бўлишини ва Ислом дини равнақи йўлида самарали ишлар олиб борилишини Аллоҳ таборака ва таолодан дуо қилиб сўрадилар.
