Озарбайжонлик мигрантлар мажбуран Украинага қарши урушга жўнатилаётгани айтилмоқда
Россияда ишлаётган мигрантлар, жумладан Озарбайжон фуқаролари Украинада давом этаётган урушга мажбуран юборилаётгани ҳақида янги маълумотлар пайдо бўлди.
Vesti.az АПАга таяниб хабар қилишича, сўнгги ҳолатда Украинага қарши урушга Озарбайжон фуқаролигига эга 20 нафар шахс чақирилган.
Озарбайжонликлардан бири 3–4 йил аввал Россияга қурилиш соҳасида ишлаш учун келган. У сўнгги йилларда жанг ҳаракатлари бўлмаган ҳудудларда, Донецк шаҳрида турли объектлар қурилишида меҳнат қилган.
Декабрда у Озарбайжонда яшаётган акасига хабар ёзиб, қурилишда ишлаётган тахминан 250 нафар ишчини мажбуран автобусларга ўтқазиб, Воронеж вилоятида жойлашган 11097-ҳарбий қисмга, 362-полкка олиб боришганини билдирган.
Уларни Украинага — фронт чизиғига жўнатиш режалаштирилган.
Қурилишда тахминан минг нафар мигрант ишлаган. Улар орасида Озарбайжон, Ўзбекистон, Қирғизистон ва Тожикистон фуқаролари бўлган.
Улар ишлаган ҳудуд тўлиқ ёпиқ бўлган, у ерга эркин кириш имкони йўқ эди. Ҳатто ишга бориш йўлида ҳам 3–4 та ҳарбий постдан ўтишларига тўғри келган. Аввалига ишчилар турар жой бинолари ва бошқа объектлар қурилиши билан шуғулланган. Кейинчалик уларни гуруҳ-гуруҳ қилиб номаълум йўналишга олиб кетишган.
Биринчи босқичда ишчиларнинг ярми, кейин эса қолганлари олиб кетилган. Аммо уларга қаерга олиб кетилаётгани ҳақида ҳеч қандай маълумот берилмаган. Кейинроқ маълум бўлишича, уларни аввал Воронежга олиб бориб, у ерда 1–2 кун ушлаб туришган, шундан сўнг Ростов вилоятидаги ҳарбий қисмга кўчиришган. Ҳеч кимдан урушга боришга розимисан, деб сўралмаган. Шунингдек, улар ҳарбий хизматга оид ҳеч қандай ҳужжатни имзоламаган.
Шунга қарамай, уларга аллақачон ҳарбий форма тарқатилган ва ҳарбий тайёргарлик бошланган. Айни пайтда бу гуруҳда тахминан 20 нафар озарбайжонлик бўлиб, уларни амалда Украинага қарши урушга гаров сифатида тайёрлашмоқда.
Озарбайжонликларга оилалари билан телефон орқали жуда кам ҳолларда боғланишга рухсат берилган. Шунингдек, уларнинг қариндошлари бу масала юзасидан Россиядаги Озарбайжон элчихонаси ва бошқа тегишли идораларга мурожаат қилгани таъкидланади.
Россия томонидан мигрантларни Украинадаги урушга турли йўллар билан жалб этилиши янги ҳолат эмас. Москва мигрантларни жанг ҳаракатлари ҳудудига ёлғон ваъдалар, алдаш, таҳдид ва қўрқитиш каби усуллар орқали юбораётгани айтилмоқда.
Иш излаб ёки бошқа мақсадларда Россияга келган мигрантларни Украинага қарши урушга жалб этиш ҳеч қандай меъёрларга тўғри келмайди. Мигрантларнинг оғир аҳволидан фойдаланиб, уларни амалда аниқ ўлимга юбориш орқали Россия навбатдаги бор инсон ҳуқуқлари ва миграция қонунчилигига мутлақо беэътибор эканини намоён этмоқда, дейилади хабарда.
Г.Холдорова тайёрлади.
