Ўзбекистон касаба уюшмалари Федерацияси Халқаро касаба уюшмалари Конфедерацияси (ХКУК)нинг тўлақонли аъзоси бўлди
Халқаро касаба уюшмалари Конфедерацияси дунёнинг 180 га яқин мамлакатидаги касаба уюшма ташкилотларини қамраб олган, 200 миллиондан ортиқ аъзони бирлаштирган энг йирик Халқаро касаба уюшмалари бирлашмаси ҳисобланади.
Бугунги кунда юртимизда касаба уюшмаларининг эркин фаолият кўрсатиши, ходимларнинг касаба уюшмаларига бирлашиши учун барча зарур шарт-шароитлар яратилган. Масалан, Ўзбекистон томонидан Халқаро Меҳнат Ташкилотининг 24 та Конвенцияси ва 1 та протоколи ратификация қилинган. Бу каби ижобий ўзгаришлар нафақат Республика миқёсида, балки нуфузли халқаро ташкилотлар ва халқаро экспертлар томонидан ҳам эътироф этилмоқда.
Ўзбекистон Республикаси Президенти Шавкат Мирзиёев 2024 йилнинг июль ойида мамлакатимизга амалий ташриф билан келган Халқаро меҳнат ташкилоти Бош директори Жильбер Унгбони қабул қилди. Мазкур қабул давомида Жильбер Унгбо ўз ташрифини Ўзбекистон раҳбари бошчилигида амалга оширилаётган самарали ислоҳотларни қўллаб-қувватлаш ифодаси деб атади.
Давлатимиз раҳбарининг бу каби саъй-ҳаракатлари натижасида мамлакатимизда меҳнаткашларнинг ижтимоий-иқтисодий манфаатлари ва меҳнат соҳасидаги ҳуқуқларини ҳимоялаш, миллий ва халқаро меҳнат стандартларини ҳаётга татбиқ этиш борасида амалга оширилаётган тизимли тадбирлар халқаро даражада юксак баҳоланиб, халқаро даражадаги ҳамкорликни ривожлантириш борасида мислсиз натижаларга эришилмоқда. Куни кеча Ўзбекистон касаба уюшмалари Федерациясининг дунёдаги энг йирик касаба уюшмалари бирлашмаси бўлган Халқаро касаба уюшмалари Конфедерацияси (ХКУК)нинг тўлақонли аъзолигига қабул қилингани фикримизнинг ёрқин далилидир.
Таъкидлаш ўринлики, 2024 йил 28-30 октябрь кунлари мамлакатимизда Халқаро касаба уюшмалари Конфедерациясининг миссияси бўлиб ўтди, унга ушбу Конфедерациянинг бош котиби Люк Триангл бошчилик қилди. Меҳмонлар Ўзбекистонда ходимларнинг ижтимоий-иқтисодий манфаатлари ва меҳнат ҳуқуқларини ҳимоя қилиш билан боғлиқ олиб борилаётган ишларни юқори баҳолади. Улар бу каби натижалар Ўзбекистон касаба уюшмалари Федерациясининг мазкур халқаро ташкилотга тўлақонли аъзо бўлиши учун муҳим шарт эканлигини алоҳида таъкидлади.
Ўзбекистон касаба уюшмалари Федерациясининг Халқаро касаба уюшмалари Конфедерациясига ҳақиқий аъзо сифатида қабул қилингани том маънода Янги Ўзбекистон касаба уюшмалари ҳаётида тарихий воқеа бўлди. Мазкур нуфузли халқаро ташкилот билан ҳамкорлик меҳнаткашлар манфаатлари йўлидаги фаолиятнинг янада такомиллашувида муҳим аҳамият касб этади.
Аъзолик Ўзбекистон касаба уюшмалари Федерацияси учун халқаро миқёсдаги имкониятларни кенгайтирибгина қолмай, мамлакатимизнинг халқаро даражадаги имижини янада мустаҳкамлашга хизмат қилади.
