Тест синови кунларида абитуриентлар учун ажратилган махсус автобуслар ҳаракати жадвали ўзгарди

5-14 август кунлари абитуриентлар учун махсус автобуслар ҳаракатланиши ҳақида эълон берган эдик. Талаб ва таклифлар асосида ҳаракат жадвали ўзгарди.
Ёшларнинг имтиҳонларга ўз вақтида ва ортиқча уринишларсиз етиб келишларини таъминлаш, уларга янада қулайлик яратиш мақсадида махсус автобуслар жадвалига ўзгаришлар киритилди.
Янги тасдиқланган жадвалга асосан соат 04.30 дан бошлаб 06.00 гача бўлган муддатда 5-14 август кунлари қуйидаги манзилларда абитуриентлар учун махсус автобуслар ташкиллаштирилади:
 - Иштихон, Қўшработ, Пайариқ, Оқдарё туманларидан имтиҳон топширувчи абитуриентлар учун Мотрид ва Даҳбед қўрғони туташган ҳудудда (халқ тилида Мотрид айланма йўлида);
- Пахтачи, Нарпай, Каттақўрғон (туман ва шаҳар) ва пастдарғомлик абитуриентлар учун Паст Дарғом тумани, Балхиён маҳалласи ҳудудидаги собиқ Чархин ЙПХ масканида;
- Ургут, Тойлоқ туманларида яшовчи имтиҳон топширувчилар учун Самарқанд тумани, Чумчуқли қишлоғи (М-39 автомагистраль йўлининг Тойлоқ айланма йўлида);
- Булунғур, Жомбой туманларидан келувчи абитуриентлар учун Чўпонота массивидаги собиқ ЙПХ штабида;
- Нуробод ва Самарқанд туманларидан келувчи абитуриентлар учун Қарши йўлидаги айланма йўлда ташкиллаштирилади.
Шунингдек, кечки соат 21.00 дан 22.00 гача бўлган вақтда абитуриентларни яшаш ҳудудларига қайтишларида хавфсизликни таъминлаш мақсадида синов имтиҳонлари ўтказиладиган ҳудудлардан туманларга автобуслар қатнови амалга оширилади.
Ҳар бир махсус автобусда унинг қайси йўналиш бўйича ҳаракатланиши ҳақида йўл кўрсаткичи мавжуд.
Ушбу автобуслардан фақатгина абитуриентлар фойдаланиши мумкин.
Автобусларнинг санитария қоидаларига риоя қилиши, йўловчилар сони вилоят транспорт бошқармаси масъул ходимлари ҳамда инспекторлари томонидан назорат қилинади.
Аҳоли учун жамоат транспорти одатдаги жадвал бўйича хизмат кўрсатади.

Самарқанд вилояти транспорт бошқармаси ахборот хизмати.