Янги спектакль: "Пора" театр ихлосмандлари ҳукмига ҳавола этилди

Каттақўрғон драма театрида ёзувчи ва драматург Қўчқор Норқобил қаламига мансуб "Пора” асари асосида саҳналаштирилган спектакль премьераси бўлиб ўтди.

Премьерада асар муаллифи Қўчқор Норқобил ҳам иштирок этгани каттақўрғонлик адабиёт ва театр ихлосмандлари учун байрамга айланди.

Томошабинлар ҳукмига ҳавола этилган ушбу спектакль Қашқадарё вилояти мусиқали ва драма театри бош режиссёри Фарҳод Бойназаров томонидан саҳналаштирилган бўлиб, премьерада янгича саҳна безаклари, спектаклнинг таъсирчанлигини оширган воқеликлар, тажрибали актёрлар жамоасининг маҳорати орқали коррупцияга муккасидан кетган кимсанинг қисмати тўлақонли очиб берилди.

Даврнинг долзарб мавзуси акс этган саҳна асарида жамиятимизнинг оғриқли нуқтаси ривожланишимизга тўсиқ бўладиган иллат, коррупциянинг бир кўриниши, инсониятнинг фақат осон йўл, пора билан пул топишга ҳаётини бағишлаб инсонийликдан узоқлашгани, оқибатда оиладаги парокандалик, фарзандини йўқотиш, сўнгги пушаймонлик каби ҳаётий воқеликлар  таъсирчан ифода этилган.

- Бир инсон ҳаётидаги фожиани кўрсатган замонавий драма билан танишгач, айни ҳаётимизнинг оғриқли жиҳати, бутун инсоният ҳаётига тегишли хавотирли масала қаламга олинганлигини ҳис қилдик, - дейди театр директори Сунатилло Казаков. - Собит образи орқали муаллиф ҳалолликнинг йўқотилиши қандай қилиб инсонни ичдан емиришини, ота эса виждон ва эътиқодининг сўнгги таянчи эканини кўрсата билган.

Дарҳақиқат, спектакль кишини чуқур ўйлашга, бахт, тинчлик ва ҳаловат фақат ҳалолликда эканини ҳис қис қилишга ундаши, шубҳасиз.

Спектакль томошабинлар томонидан катта қизиқиш билан кутиб олинди.

- Албатта, томошабиннинг эътирофи ижодкорга катта илҳом бағишлайди, - деди асар муаллифи Қўчқор Норқобил спектакль ҳақида фикрларини билдирган томошабинларга миннатдорлик изҳор этаркан. - Каттақўрғон азалдан зиё маскани сифатида донг таратган. Бугун ушбу спектаклга ижодкорларнинг моҳирона ёндашуви, томошабинлар эътиборини кўриб бунга амин бўлдим.

Шунингдек, асар муаллифи актёрларнинг маҳоратини алоҳида эътироф этди. Албатта, инсониятни ҳалол ва пок яшашга ундайдиган, тарбиявий аҳамиятга эга бўлган бу каби спектаклларнинг томошабинлар эътиборига ҳавола этилиши жамият ва давлат ривожига тўсиқ бўладиган иллатларга қарши курашиш, уларнинг олдини олишда муҳим аҳамият касб этади.

Ҳилола Эргашева.