АҚШ президенти: "Уруш бошланса вайронагарчиликлар ва қурбонлар Эрон ҳудудида бўлади, улар шуни унутмасин!"

АҚШ президенти Дональд Трамп ҳеч қачон Эроннинг ўз ядро қуролига эга бўлишига йўл қўймаслигини маълум қилди.

"Мен ҳеч қачон Эроннинг ядро қуролига эга бўлишига йўл қўймайман", деган у  "Fox News" телеканалига берган интервьюсида.

У шунингдек, Эрон билан содир бўлиши мумкин бўлган эҳтимолий уруш ҳақида ҳам гапирган.

"Мен уруш оловини ёқмоқчи эмасман. Аммо, Эрон шунга мажбур қилса унга қарши уруш очаман. Эрон, авваламбор, ўз ядро қуролини яратиш дастурларидан воз кечиши керак. Уруш бу вайронагарчиликлар, миллионлаб одамларнинг ҳалок бўлиши демакдир. Шундай экан, мен қанчалик урушишдан қочсам, Эрон томони ҳам шундай қилиши керак. Агар мен урушишдан қочаверсаму, Эрон уруш томон қадам ташлайверса, муқаррар уруш содир бўлади. Эрон раҳбарияти ана шуни инобатга олиб, ақл билан иш тутиши лозим. Шунингдек, улар унутмасинларки агар уруш содир бўлса, у АҚШ ҳудудида эмас, Эрон ҳудудида бўлади. Вайронагарчиликлар ва қурбонлар АҚШда эмас, Эронда бўлади. Эрон томонига урушдан қочиш учун шунинг ўзи кифоя бўлиши керак", дейди у.

Эслатиб ўтамиз, охирги икки ҳафтадан бери АҚШ ва Эрон муносабатлари боши берк кўчага кириб қолди ва бунда ҳар икки тараф бир-бирини айблаяпти.