Бегона тақдир
Жанна ва умр йўлдошининг узоқ вақт фарзандлари бўлмаган эди. Улар кўп йиллар тирноққа зор яшашди. Ёши қирққа борганда тангрига илтижолари ижобат бўлди: қиз фарзанд кўришди, исмини Уляна деб қўйишди. Бахтиёр ота-она қувончининг чеки йўқ эди. Бир неча йил Жанна бахт оғушида гул-гул яшнаб яшади. Дугоналари, танишларига бахтиёрлигини сўзлаб чарчамасди. Орадан кўп ўтмай, у ғамгин бўлиб қолди, гурунгларда иложи борича аввалгидек қизалоғи ҳақида оғзидан бол томиб сўзлашдан ўзини тиярди.
Гап шундаки, Жанна ва эри қизалоғи уч ёшга тўлганида ундаги ғалати ҳолатларни сеза бошлашди. Кутилмганда Уляна ота-онасини “хола ва амаки” дея атай бошлади. «Менинг ота-онам бошқа, исмим ҳам Уляна эмас, Анна», деди у бир кун. Ота-она буни ҳазилга йўйиб, аввалига эътибор беришмади.
Вақт ўтиб, Улянананинг бошқа кишиларнинг фарзанди эканлиги ҳақидаги давоси янги тафсилотар билан бойиб борарди. Масалан, у эри ва иккита ити борлигини гапирарди. Ҳатто уларнинг лақаби Алма ва Кинг эканлигини таъкидларди. Қизалоқ уйининг қаерда жойлашгани, теварак-атрофини, оила турмушини батафсил тасвирлаб берарди.
Кўп ўтмай, Жаннани даҳшатга солган яна бир ҳолат аён бўлди. Сайр чоғида Уляна югуриб бориб, сигарет қолдиғини олиб, лабига қистирди. Онаси ташла, ифлос деб танбеҳ берганида Уляна илгаридан чекишини айтди. Орадан вақт ўтиб, Уляна ўзи яшаётган қишлоқнинг номини ҳам айтди. Жанна интернетда ҳақиқатдан ўзларидан уч-тўрт соатлик йўл нарида шундай қишлоқ борлигини аниқлади. Бунинг устига Уляна кучукларисиз зерикаётганини айтиб йиғларди.
2015 йил кузда Жанна эри билан Уляна айтган қишлоққа боришди. Қизалоқ уйни дарҳол таниди ва ичкарига отилди. Уларни қаттиқ вовуллаб, жунлари пахмайган баҳайбат ит қарши олди.
- Алма, Алма! Қалайсан? - ит Улянани таниб хуришдан тўхтади ва думини силкитиб қизалоққа эркаланди. Уй эшигига осилган қулф занглаган, ҳовлида анчадан буён ҳеч ким яшамаганлиги кўриниб турарди. Шовқинни эшитиб, қўшни кампир чиқиб келди ва ким кераклигини сўради.
Кампир итнинг эгаси Анна ичкиликка муккасидан кетиб, ахлоқсиз ҳаёт кечиргани, ичиб эри билан ҳар куни жанжаллашгани, охир-оқибат жанжал Аннани жиннихонага, эрини панжара ортига тушиши билан якун топганини сўзлаб берди. Эгасиз қолган итларни ҳеч ким олмади. Кўп ўтмай Кинг ўлибди, Алма ёлғиз қолибди. Уляна кучукдан ажралгиси келмас, Алмасиз ҳеч қаерга бормаслигини айтиб туриб олди. Жанна билан эри итни ҳам олиб кетишдан бошқа чора топишмади. Бўлиб ўтган воқеа Жаннани қаттиқ изтиробга солди. У Улянани жонидан ортиқ яхши кўрар, бироқ қизи унга эмас бошқага тегишли эканлиги қалбини эзарди. Уляна 14 ёшга тўлганда исмини Анна деб ўзгартишини билдирди.
“Планета чудес”дан Т.Шомуродов таржимаси.
