Британия вакцинасининг кўнгилли синов иштирокчиси Бразилияда вафот этди
Бразилияда 28 ёшли шифокор вафот этди. У Оксфорд университети ва AstraZeneca фармацевтика компанияси ҳамкорлигида яратилган коронавирусга қарши вакцина синов дастурида кўнгилли қатнашчилардан эди. Ўлим сабаби қилиб COVID-19нинг оғир асоратлари кўрсатилмоқда. Аммо эркакка вакцина ёки плацебо (ҳеч қандай хусусиятга эга бўлмаган, беморнинг ўз-ўзини ишонтириши орқали таъсир кўрсатувчи зарарсиз модда) юборилганлиги номаълум.
Бир пайтнинг ўзида Бразилия бўйлаб AstraZeneca вакцинасини тадқиқ қилиш бўйича халқаро дастурда 8 минг киши иштирок этмоқда, дея аниқлик киритди Рио-де-Жанейрода тестлар ўтказаётган Д’Ор институти мутахассислари. Бунда уларнинг ярмига вакцина дозаси, қолган ярмига плацебо юборилган.
Reuters агентлигининг ёзишича, агар вафот этган кўнгиллига синалаётган вакцина юборилганлиги аниқланса, препаратни синаш тўхтатилади. Ҳозирча Оксфорд университетида вакцинанинг мутлақо хавфсизлигини таъкидлашмоқда. Университет расмий вакилининг билдиришича, кўнгиллилардан бири вафот этганига қарамай, препаратни синовдан ўтказиш давом этади.
Британиянинг Daily Star нашри Бразилиядан келган кўнгиллилар коронавирусга қарши синалаётган препаратни июнда - клиник синовларнинг учинчи босқичида қабул қила бошлаганини таъкидлашди. Нашр маълумотларига биноан, Сан-Паулу, Рио-де-Жанейро ва Салвадордан жами 4 минг нафардан зиёд бразилиялик кўнгиллилар тадқиқотга жалб қилинган.
Daily Star нашрининг хабар беришича, июлда Оксфорд университети ва AstraZeneca антиковид вакцинасининг биринчи синов натижалари унинг хавфсизлиги ва иммунитет реакциясига эгалигини эълон қилишган эди. Ўшанда тадқиқотда 1077 киши иштирок этганди. Вакцинани қўллаш натижасида уларда COVID-19 га қарши кураша оладиган антитела ишлаб чиқилгани маълум бўлди.
