Матонатлилар баҳсида Осиё чемпионлари аниқланди

“Паратриатлон бўйича Самарқанд – 2023 Осиё чемпионати” якунланди. 

Самарқанд мезбонлик қилган чемпионат 9 тоифада ўтказилди ва ҳар бир тоифа бўйича ғолиблар тақдирланди. Мусобақада 6 нафар пара-триатлончи юртимиз шарафини ҳимоя қилди.

-  Пара-триатлонда биринчи марта иштирок этдим, - дейди Ўзбекистон терма жамоаси аъзоси Саидакбар Ғозиев. -  Шу пайтгача сузиш спорти билан шуғулланиб келардим. Юртимизда ўтказилган илк Осиё чемпионатида PTS 2 тоифаси бўйича ғолибликни қўлга киритдим. Энди ушбу спорт тури билан профессионал даражада шуғулланиб, бундан-да юксак натижаларга эришмоқчиман. 

Эртага, 10 июнь куни “Самарқанд – 2023 Осиё триатлон кубоги” бўлиб ўтади. Унда дунёнинг энг яхши спортчилари: 50 нафар аёл ва 50 нафар эркак иштирок этади. Шу куни Осиё кубоги доирасида Марказий Осиё спортчилари ўртасида (CАТА – Central Аsia Triathlon Association) алоҳида мусобақа ва тақдирлаш маросими ҳам бўлиб ўтади.