Самарқандлик мактаб ўқувчилари нуфузли «Young Scholars Award» мукофотини қўлга киритишди
Самарқандлик иқтидорли икки мактаб ўқувчилари - Зафар Нурмамадов ва Асадбек Олтиновлар бош қароргоҳи Перу пойтахти Лима шаҳрида жойлашган La Colegios Cruz Saco халқаро илмий изланиш ташкилотининг «Young Scholars Award» мукофотини қўлга киритишди.
15 ёшли Зафар Нурмамадов Самарқанд шаҳар 13-умумтаълим мактабининг 11-синф ўқувчиси бўлса, Асадбек Олтинов ҳали 48 сонли мактабнинг 9-синфида ўқийди.
La Colegios Cruz Saco халқаро илмий изланиш ташкилоти – бу фан ва технологиялар соҳасида иқтидорли ёшларни қўллаб-қувватлаш ва ривожлантиришга йўналтирилган халқаро таълим ташкилоти бўлиб, у турли мамлакатларда фаолият юритиб, табиий ва аниқ фанларни чуқур ўрганишга ҳамда талабалар ўртасида тадқиқот кўникмаларини ривожлантиришга қаратилган дастурларни таклиф этади. Уларнинг эътирофига сазовор бўлган тадқиқот «Уч хил бошқарув шаклига эга ташкилотлар (Тил мактаби, IT ташкилоти ва шифохона) даги бошқарув тизимларини дифференциал таҳлил қилиш» мавзусида ёзилган. Ўзининг чуқур назарий-илмий таҳлили билан ажралиб турган тадқиқот долзарб эканлиги туфайли ҳам юксак мукофот билан эътироф этилди.
